La Usc di Ladins

L Comun general de Fascia l’é dò che l se endreza per ge fèr fèr ai sentadins de la val l test per mesurèr i anticorpes contra l Covid-19.

L Consei de procura del Comun general, vedù che i sentadins de Ciampedel e Cianacei à jà fat i tesć sierologics de la Provinzia, se à pissà de slarièr fora l screening di anticorpes ence a duta l’autra jent de Fascia e l ge à dat sù l’encèria de se cruzièr de l’endrez e de troèr i finanziaments al conseier de procura a la sanità Gianluigi De Sirena.

Se trata de n test desche chel che l’é stat fat a Ortijei, sorì e asvelto, vegn tout demò na gocia de sanch da n deit de la man che vegn let dai despositives medics zertifiché.

I anticorpes contra l virus é prejenc tel sanch de duta chela persones che à jà ciapà l virus. I test per veder se la jent à jà chisc anticorpes no serf per fèr na diagnosi o per saer se na persona à la malatìa, per chest l’é l tampon, ma piutost i é de utol per tor dezijions politiches e strategiches ajache se vegnissa a saer la perzentuèla prezisa de cotenc sentadins che à jà abù la malatìa.

Se se vegnissa a saer che la perzentuèla é jà al 30-40% e che se é dò che se se arvejina al 50% se podessa ipotisèr na imunità “di gregge”, descheche i ge disc, e perveder donca la fin de la mesures restritives. Se podessa pissèr a se endrezèr con manco cruzies a la neva sajon da d’istà e chi che é positives ai anticorpes zenz’auter podessa jir a lurèr con manco festidech per sé e per i etres.

L projet del Comun general de Fascia vegnarà endrezà de gra a la sinergìa anter CGF, i Comuns, la Crousc Checena e i dotores autorisé sul teritorie publics o privac. L Comun general à domanà l consens de la Provinzia de Trent e de l’Azienda Sanitèra.

L’adejion é volontèra e pel tor pèrt demò chi che à più che 18 egn, chi che vel fèr l test cognarà sotscriver l consens e l’autorisazion a durèr si dac da man de la sanità publica.

Chisc test no dèsc nesciuna segureza de no poder amò ciapèr l virus ma i serf demò a verifichèr coche l se à sparpagnà fora te val. I despositives medics zertifiché vegnarà compré da la Crousc Checena col sostegn finanziarie del Comun general de Fascia e di Comuns touc ite e i enteressé a fèr l test paarà demò n picol contribut. I sentadins ciaparà na comunicazion a cèsa con duta la informazions.



 (Monica Cigolla)