La Usc di Ladins

Per via de l’emergenza sanitèra Covid 19 chest’aisciuda l comun de Sèn Jan à dezidù de no fornir sù con la violetes la vaneses e i spazies a l’averta de sie teritorie, descheche l’é tradizion te chest temp de l’an, ma l’é stat pissà na soluzion alternativa creativa e originèla.

Aldò de l’idea de la conseiera Antonella Winterle l’é stat portà inant la scomenzadiva »Sèn Jan, n fior per renascer ensema« con chela che l’é stat envià i bec de la scoles populères de Sèn Jan, i joenec de la scola mesèna ma ence duc i sentadins che aea piajer, a realisèr fiores da color da loghèr apontin ti spazies publics per i fèr più bie e gustegoi, spetan de poder jir da nef da fora a se goder nosc ambient.

»L’é stat dalbon na bela responeta da part de le scole ma ence da man di sentadins – à dit la conseiera – l’era la sala de consei piena e rasa, sion dalbon contenc de veder tanta partezipazion. Ensema coi lurieranc de comun aon metù fora duc i lurieres che ne é stat portà. L’é stat durà n muie de legn, plastica e polistirol de spes de rezicle, ma ence lana, teila, picoi balons da slonfar sù, perline, sasc depenc, dalbon ogne sort de material.

A Poza te le strade de Sorapoza e del medico l Grop de Sorapoza à domanà de poder fornir sù ensema con si bec duta la strada a na maniera valiva: dute le decorazion é state fate de legn e l’é stat metù fora ence bestiole embalsamade, cerves, faine, bolp, gial zedron.

L’é bel veder che ades che pian pian se pel tacar a jir fora, i scolees va stroz a cerir olache l’é stat metù fora so lurier. Dapodò l’é ence n muie de jent che se ferma a ge vardar a chisc bie lurieres. De jugn te le vanese vegnarà metù fora i fiores donca duc i lurieres vegnarà tiré sù ma aon intenzion de i logar duc te gran vasche dute te piaza, a na vida che i reste fora dut istà e magari i duraron ence i autres egn.«

 (cri.m)