La Usc di Ladins

L’é passà set meisc da canche l joen da Moena Andrea Dellantonio, clasc 1992, l’é pontà demez per l Giapon. L’an 2020 cognea esser per l Giapon l’an di record, anter Olimpiadi e exploit del turism internazionèl. Ma ence aló te pecia setemènes la pandemia à dessatà duc i ensomesc. Al scomenz someèa che l Giapon sie stat sparagnà dal contage ma via per l meis de oril l’é cresciù debel l numer de malé e coscita ence tel Paìsc del »Sol Levante« l prum minister Shinzo Abe à cognù dezider de serèr scoles e aziendes per ge fèr front a l’epidemia de Covid-19. Chest però demò a Tokyo e te 6 provinzies sun 47 del Giapon percheche aldò de la Costituzion del Paìsc, ne l goern ne la prefetures pel ge neèr ai sentadins l derit de jir fora de cèsa e donca no l’é stat pervedù nesciuna sanzion. Aboncont te la cultura giaponeisa l’é semper stat n gran respet per la regoles ma ence per l lurier e la tradizions. I giaponeisc é usé a mantegnir la distanzes sozièles e a portèr la mèscra de protezion, ence demò per tegnir ciaut l mus.

La tema per l nef virus é grana daperdut e i momenc é stac senestres ence te la zità de Kyoto olache vif Andrea. Da el se aon fat contèr che che l fèsc e coche l vif chesta neva situazion.

Co éla che te ès dezidù de jir tel Giapon?
Gio me é laureà en lengac orientai a la Cà Foscari de Unejia, canche é dezidù de studiar giaponeis saee jà che da zeche ora fosse jit tel Giapon. É cernù de jir a Kyoto, na beliscima zità cognosciuda desche la »zità di mile tempies«. Son pontà demez da Fascia ai prumes de otober del 2019.

Che fèste a Kyoto?
Son vegnù chiò per miorar mie giaponeis, vae te na scola de lengac per foresć olache l’é jent da dut l mond e endana laore part-time al front-desk de n pìcol hotel. Stae da soul te n pìcol cartier vejin a la scola.

Co te troeste, con la jent e col lengaz?
Endana me troe n muie dalvers, ence se ogne tant l’é mingol senester col lengaz. L lengaz giaponeis l’é difizile, soraldut tel scrit, ma più senester l’é proprio la strutura de la frase deldut desvaliva da chela fasciana e taliana. L’é engrà ajache se cogn se usar a pissar a le robe a na maniera desvaliva. Me é usà ite belebon ence col magnar, l me piasc n muie ence se l’é saores deldut desvalives dai nesc.

Rejoneste semper giaponeis o ence etres lengac?
Rejone beleche semper giaponeis. Demò ogne tant ingleis canche vegn foresć te hotel. Kyoto l’é n zenter turistich e vegn n muie de foresć ma ence jent da autre man del Giapon, dijon mez e mez. Te cheste ultime setemane però se sposta pecia jent, resta demò chi che à da se mever per lurier.

De più su La Usc stampèda de vender ai 8 de mé 2020.

 (Monica Cigolla)