La Usc di Ladins

Duc volessa fèr l test: l lo desmostra ence la perzentuèles de sentadins de Ciampedel e Cianacei che te chesta setemènes passèdes se à metù a la leta volontariamenter per l screening endrezà da la Provinzia de Trent. En mèrtesc ai 12 de mé l president de la Provinzia de Trent Maurizio Fugatti, compagnà dal diretor general de l’Azienda Sanitèra Paolo Bordon, é ruà a Cianacei per veder coche la é jita coi test sierologics. Chiò l se à troà co l’ombolt Silvano Parmensani, l conseier provinzièl ladin Luca Guglielmi, i sanitères e la persones che se à metù a la leta te senta de la Protezion Zivila. En chela dì l’é stat fat 331 test e 95 tampons.
»A Cianacei l’é stat passa l 90% de sentadins che à fat l test - à dit Fugatti - a chesta vida duc arà n screening total de sia situazion epidemiologica. No l’era dit che se aesse arjont chisc livìe percheche nesciugn é stac oblighé, ma la jent à responet en gran numer. L test sierologich l’é n strument che aon metù a la leta di 5 Comuns del Trentin sot osservazion (Cianacei, Ciampedel, Pieve di Bono-Prezzo, Vermiglio e Borgo Chiese), n percors zertificà sot l’aspet scientifich e con la supervijion de l’Istitut superior de la sanità. Sion na ezelenza nazionèla - à amò dit Fugatti - a chesta vida te chisc 5 Comuns se pel aer na enrescida epidemiologica vardan cajo per cajo.«  (Monica Cigolla)