La Usc di Ladins

I é stac valuté un di strumenc chief per fèr pontèr via endodanef l Paìsc en segureza. Te chest moment duc vel fèr i test sierlogics e ogne region e provinzia se mef per so cont. Ence n muie de firmes privates se à moet da soules fajan referiment a dotores e studies privac.

Ma sun chisc test l’é amò n muie de dubies. Endèna ence l Minister de la Sanità à tout posizion con n document manà fora ai 9 de mé.

Tel document vegn dit che »i test sierologics basé su l’identificazion di anticorpes IgM e IgG spezifics per la diagnosa de infezion da SARS-CoV-2, aldò del parer del Comitat tecnich scientifich del Departiment de Protezion zivila, no pel, te chest moment de l’evoluzion tecnologica, tor l post del test molecolar col tampon del nès e del col ajache se a na persona no ge vegn troà i anticorpes no vel dir che no l’aesse ciapà na infezion da pech temp zenza sintomes col risech donca che la passe amò l contage. Se enveze n test é positif l disc che la persona é stata infetèda ma no l moscia se i anticorpes é stac neutralisé, se la é stravardèda e per cotant de temp e se la persona é varida.« Duta chesta valutazions conferma che i test no pel esser conscidré desche strumenc diagnostics che tol l post del test molecolar con tampon.

Auter che »atestat de imunità« che consent de jir a lurèr en segureza.

Chest aboncont no vel dir che chisc test no serve a nia. Descheche spiega l document del Minister de la Sanità »l’é n strument emportant per stimèr la difujion de l’infezion te na comunanza; la sierologia pel meter al luster l’esposizion al virus; i pel esser de utol per l’idetificazion de l’infezion da SARS-CoV-2 te persones zenza sintomes o con sintomes lijieres; i pel esser de utol per definir miec l tas de pericol de l’infezion virala respet al numer de persones contagèdes dal Covid.«

De più su La usc stampèda da vender ai 15 de mé 2020. 

 (Monica Cigolla)