Couribocia: miec chi da poder lavèr

Data

23 de mei 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Se pel n troèr o n fèr fèr de personalisé ence da desvaliva firmes de nosc raion.


Joel dalbon durèr i couribocia? L debatit é belebon feruscol. Tropes concorda che te lesc averc zenza jent vejin sie miec no tegnir sul mus mèscres de protezion (o mascheroc, con la parola ladina durèda vin Badia), ma canche se va te lesc seré o se rua apede a de autra jent chest sistem l’é de utol per schivèr l sparpagnament di virus, se sà ben ensema con i etres adempimenc racomané.

Ampò la doura del couribocia la é de obligh olache l’é jent e somea che aron amò besegn de chisc presidies tel davegnir.

Al scomenz de chesta emergenza ai sentadins de Fascia ge é stat portà la mèscres de protezion da durèr e trèr demez, de gra a la Protezion Zivila de la Provinzia e ai Comuns fascegn: n don che tel rest de la Tèlia tropes no à podù aer.

La indicazions sun cotant de temp che se pel durèr n couribocia e sul met de l dejenfetèr con prodoc a basa de alcol no les é deldut segures, se pel dir che per chi che laora e i cogn l tegnir dut l dì l’é jà massa na dì entrìa, chi che l met demò l temp de jir te na boteiga i pel l tegnir enscin a na setemèna. Dapò se cogn l trèr demez.

La prospetiva l’é che l couribocia sie destinà a doventèr n forniment da aer tras te noscia crignes e no se pel pissèr de seghitèr con chi da trèr demez, tant per na rejon economica che, fosc amò de più, per na rejon ecologica. Se à jà tacà a veder couribocia stroz jabas, e ence se i vegnissa duc trac demez tel refudam che vanza, descheche l’é comanà, i creassa n gran mont de refudames.

N muie miec donca vardèr a chi da poder lavèr e durèr endò. Aldò de la domana, la produzion é tachèda sobito. Chi che à mingol de pratega a cojir i pel ence proèr a i fèr enstesc, sul web se troa ence n muie de ‘tutorial’. Ampò per chi che vel les comprèr jà fates la perferida no mencia nience a livel local, per didèr noscia economìa enveze che jir su internet.

De più su La Usc stampèda de vender ai 22 de mé 2020.

 (Lucia Gross)