La Usc di Ladins

Te chesta fasa olache l Covid-19 somea aer perdù mingol de potenza, anter la ativitèdes che taca via endodanef l’é ence la scolines de Fascia, che verjarà si ujes al prum de messèl e les jirà inant desche i etres egn enscin ai 31 de aost. 

L Protocol de Sanità e Segureza, lurà fora en colaborazion con l’Azienda Sanitèra, vegnù fora ai prumes de jugn, l dèsc desche indicazion per duta la scolines del Trentin de verjer per gropes de 10 bec con 2 ensegnantes per ogne grop.

Per chel che vèrda la scolines provinzièles de Fascia, la coordenadora Tatiana Soraperra l’à dit che »l’ipotesa de avertura la é de 7 ores en dì, fora che per Pera che la é de 5: en vender ai 26 te la Scolines provinzièles l’é l soralech con i Rspp (Responsaboi servije prevenzion e protezion) de Trent e i referenc locai per siglèr a na vida definitiva l projet organisatif con la definizion di oraries. Aldò di vincoi dac dal Protocol, tegnan cont del personal en dotazion e de la dimenjions de la strutures, l’é stat possibol tor ite 10 bec a Soraga, donca un grop, 3 gropes a Pera, donca 30 bec e 3 gropes a Cianacei, 30 bec.«

A fèr domana en temp utol a Soraga l’é stat 12 families, a Pera 30 e a Cianacei 54. Anter la domanes ruèdes, a aer l derit de jir a la scolina l’é stat presciapech l 70% di bec, aldò de la graduatoria metuda jù coi criteries deliberé da la Jonta provinzièla: bec per chi che l’é stat ativà n projet educatif individuèl; bec con duc e doi i genitores che laora tel setor privat; bec con amancol un genitor tel setor sanitèr publich; bec con amancol un genitor ti setores segureza, defendura e socors; bec con amancol un genitor empegnà d’istà tel setor educazion e istruzion. Se no se rua ite te una de chesta categorìes ge vegn dat priorità al numer de fies e anter doi situazions valives rua ite l bez più gran, chel più vejin a jir a la scola populèra. Chesta situazion ben segur à scontentà e metù en dificoltà n muie de families, l’é stat palesà critiches ence belebon fortes a la Scola (v. box) che ampò – l’à sotrissà Soraperra - »no l’à nesciuna sort de autonomìa sul Protocol Sanità e Segureza ma la cogn demò l’aplichèr, no l’é nesciun spazie per poder l meter en descuscion, nience a livel de criteries.«...


L'articol va inant su La Usc nr 25 stampèda ai 26 de jugn  (Cristina Marchetti)