La Usc di Ladins

En domenia ai 21 de jugn a Cianacei l’é stat zelebrà la Sènta Messa per la Sègra del Sacro Cher de Gejù da don Mario Bravin. Enceben la situazion sanitèra, la Sègra l’é stat na ocajion per se troèr endodanef.

Endèna la perdicia, l curat l’à rejonà de la reijes del chest cult. La comunion la é stata data fora, ge jan dò se sà ben a la normatives de segureza. Ajache i fidei te gejia i cogn esser dombré, tegnir l distanziament e se loghèr olache l’é segnà dai adesives, no à podù esser prejenc i gropes folcloristics. L’é ruà na raprejentanza del grop de la Mèscres de Cianacei e Grìes, de la Musega Auta Fascia, del grop de Folclor de Cianacei e di Schützen.

Ti benc l’era ence l capocomun Silvano Parmesani e i Capofrazions Rinaldo Debertol per Cianacei, Olivo Micheluzzi per Dèlba e Francesco Verra per Penìa. Amò apede, l’era l Comandant di Studafech Tommaso Del Favero.

A la fin de la zelebrazion, la jent à podù se fèr doi ciacoles de fora de gejia con n picol aperitif e n bicer, semper mantegnan la distanzes.  (Nicoletta Riz)