Sèn Vile e l braciacol ai preves

Data

07 de messel 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
La fin del meis de jugn la é rica de sagre per la comunanza de Fascia. Dò chela de Sèn Jan de jugn, ai 26 l’é stat Sèn Vile e chiò l’ocajion ogne an é bona per festejar i preves da Moena che à arjont n cedean toron de sia ordenazion. Chest’outa ge é stat fat n fort batiman a don Mattia Vanzo che à festejà 5 egn de sacerdozie, don Walter Sommavilla con si 25 egn de ordenazion, don Paolo Zamengo con 45 egn e n muie passé a Moena, Suor Giuseppina Chiocchetti con si 55 de ordenazion e don Elio Sommavilla che chest an festeja adertura 70 egn da preve.
La messa grana é stata zelebrada da don Walter, ensema ben segur al curat don Enrico Conci e ai autres preves prejenc, anter chisc ence don Bruno Daprà. A la sagra l’era ence Devis Bamhakl che aessa cognù vegnir ordenà preve a Trent ai 20 de jugn ma la consacrazion é stata sburlada ai 12 de setember. Endana sia pardicia don Walter à rejonà de sia esperienza coi malé de Covid a l’ospedal Sènta Maria del Chermin de Roveredo olache l porta inant sia miscion religiousa e l’à metù dant soraldut l’aspet uman de chesta emergenza sanitara.  
La sagra é stata averta bel bonora con le sonade de n grop de museganc de la Musega de Moena che dai cuerc de paìsc à descedà fora la comunanza.
Chest an per via de la desposizions anti Covid no se à podù endrezar feste particolare ma l Comitat manifestazion e l Comun à metù dant l met, en colaborazion con bares e restoranc del paìsc, de poder jir a disnar e marenar a n priesc spezial.  (Monica Cigolla)