La Usc di Ladins

No se pel amò ite te la Cèsa de Paussa de Fascia. La direzion à endrezà n picol post serà ite, fora da la strutura, che dèsc su na fenestra, olache ades i parenc, su apuntament, i pel jir a veder i ghesć e rejonèr con ic, ma separé dal vierech, zenza nesciun contat fisich. N picol vèrech inant.
La desposizions per chel che vèrda la Cèses de Paussa disc amò che te la strutura pel ite demò chi che vegn autorisé da la direzion sanitèra e ti meisc de l’emergenza sanitèra zachei à podù ite, ma demò parenc de ghesć en fin de vita.
N sistem de prevenzion rigorous à permetù de fèr de la Cèsa de Paussa de Fascia na ezelenza, lodèda ence foradecà: nience n ghest se à malà, te na val che é stata tocèda a na vida dassen pesoca dal contage, e de chest ge vel ge dèr gran merit a trei femenes che rec la strutura: la dotora Jennifer Vedruccio, diretora sanitèra de la strutura, Elisa Emiliani, che cour la encèria de diretora fin canche vegnarà fat l concors, che l’é stat sburlà a chest uton, e la presidenta Barbara Bravi. É rejonà, fora da la RSA, con la presidenta e la diretora, che la ne à deschiarì ence chel che comportassa i mudamenc te la direzion sanitèra proponec da la Jonta provinzièla, che à fat se remir sobito l'Upipa. 

De più su La Usc 29 de anché, vender ai 24 de messèl  (Lucia Gross)