La Usc di Ladins

Sarà la ciantautora fascèna Martina Iori, con sie quintet de misizisć, a averjer da les 11 da doman con l matinée l rich program che vegn metù a jir ai 15 de aost, en Sènta Maria Maor, tel Ciastel de Bornech al Messner Mountain Museum Ripa. Na dì entrìa dedichèda a la cultura, l lengaz e l’èrt di ladins de duta la valèdes entorn l Sela, metuda a jir tel chèder de la mostra »Ester Ladins« endrezèda fora per dut l’istà per i 60 egn de la Sociazion EPL, Ert por i Ladins.
Dò la cianties de la joena da Dèlba, da la una sarà l’avertura de la scomenzadives, con Clara Mazzi che portarà dant l personaje de Tanna, la reìna di Crodères, e dapò la mini lezions de ladin endrezèdes da les 3 e da les 4 domesdì respetivamenter da Ulrike Frenademetz dl Istitut Ladin Micura de Rü e da Evelyn Bortolotti dl Istitut Ladin Majon di Fascegn. Etres momenc sarà dediché a la letradura, con la poejìes de Christian Ferdigg e a la storia e la tradizions dla Ladinia con Werner Pescosta.
No menciarà i laboratories per i picoi: da la does chel dedicà a pitores e colores su l’èrt populèra, con Daniela Brovadan e Martina Chiocchetti del Museo de l’Istitut de Fascia, da les 4 chel su la musega col liber »Jun a cianté!« con Silvia Liotto e l clown Sälly e da les 5 su la letradura con letures dal liber Pinocchio, semper con Silvia Liotto per endrez de l’Istitut Micurà de Rü.
Da sera l protagonista sarà Reinhold Messner, che da les 8 contarà la Ladinia e dapò da les 9 vegnarà metù dant l film del medemo Messner sul Saslonch.