N gran e fort batiman à proclamà en lunesc ai 19 de otober la conferma de Fernando Brunel a cef de l’Union di Ladins de Fascia per n auter mandat de trei egn.
L nef Consei, che tol ite 21 persones, lità ai 10 e 11 de otober dai sozi de la Sociazion fascèna, se à binà per la pruma outa enstadì te sala de Consei de Comun de Sèn Jan a Poza, ben segur descheche perveit la desposizions amò più strentes dates fora con l’ultim Dpcm.
Dò la ratifica di resultac de la litazions, un per un i conseieres se à prejentà. Apede a chi confermé, chest’outa l’é ruà te Consei 10 persones neves, n renovament che é stat let con gran positività da man de duc.
L Consei é stat avert dal president onorarie Antone Polam:
https://www.lausc.it/valedes-ladines/fascia/13783-fernando-brunel-conferma-president#sigProId67c14d1235
Dijaane al scomenz de la litazion a president de Fernando Brunel. Na conferma de stima per l lurier e la pascion che l’à metù te chisc egn passé te Consei, ruèda da più che un conseier che ge à resservà paroles de recognosciment e de develpai.
I conseieres é passé a la nomina de doi vize presidenc descheche perveit l Statut. L president Brunel à proponet la doi persones che à ciapà più stimes: Stefano Weiss e Nicoletta Riz. Duc doi à palesà paroles de rengraziament per la stima. »Vardaron de ge star apede al president – à dit Weiss – segures che chest nef grop de joegn che aon apede podarà ne didar a jir inant.« Paroles de contenteza ence da man de Nicoletta Riz che à dit che la portarà dant la ousc di joegn con la segureza de aer tedant n temon de gran esperienza.
De più su La Usc 42 che vegnarà fora ai 23 de otober
(Monica Cigolla)