L taca pian pian a ciapèr na neva parbuda l paìsc de Moena, mìngol per l fornir sù per la festes da Nadèl e mìngol percheche la neva aministrazion à pissà de ge dèr na neva viesta.
»Aon entenzion de mudar belebon – à dit l’assessor Maurizio Deville – con intervenc de aredo urban fac ensema a la responsabola Alessandra Tartarini. Aon volù tor via la ciaseta che da set egn la era oramai deventada fissa te piaz ma no la vegniva più dorada. Per chest invern ge aveane domanà ai studenc del Liceo artistich de far le statue de nef ma te chesta situazion da Covid no saon se i poderà le far. E dapò aon enjignà jun Navalge e te autres posc’ del paes de növe sief de legn che tira l’ölge.«
L’é stat belapontin na marevea canche aon vedù fora per l paìsc de Moena chesta neva sort de sief de legn. Na sief particolara, fata descheche la vegnìa fata chisc egn passé. Per documentèr la desvaliva sorts de sieves che vegnìa fat enlouta, l’Union di Ladins ge à dedicà a chest argoment l numer del 2019 de l’Almanach olache l’é stat publicà i bie dessegnes di studenc del Liceo artistich de la Scola Ladina de Fascia. L’intenzion de l’Union di Ladins l’era belapontin chela de meter dant i desvalives ejempies de sieves percheche n vegne fat amò de tèles ence aldidanché.
L’é con piajer donca che publicon l retrat chiò sotite de la neva sieves te paìsc de Moena. (Monica Cigolla)
Sieves da n’outa…
Galaria retrac
View the embedded image gallery online at:
https://www.lausc.it/valedes-ladines/fascia/14066-sieves-da-n-outa#sigProId3ee43f44d3
https://www.lausc.it/valedes-ladines/fascia/14066-sieves-da-n-outa#sigProId3ee43f44d3