La Usc di Ladins

Enstadì endèna i lurieres del Consei provinzièl l conseier provinzièl ladin Luca Guglielmi à portà dant na interogazion en cont de la tratatives col Stat e l Comitat tecnich scientifich en previjion del scomenz de la sajon da d’invern 2020/2021.
Guglielmi te sie at politich aea uzà fora che la situazion de malsegureza per la pandemìa no ge dèsc l met ai operatores de pianifichèr e programèr la strategìes. Per chest Guglielmi à domanà a che pont che l’é la tratatives col Stat e l Comitat tecnich scientifich per i raions più enteressé dal turism da d’invern, desche l Trentin per cognoscer na data e la modalitèdes per l scomenz de la sajon.
Se vegnissa confermà la posizions del President e del Consei di Ministres di dis passé – disc Guglielmi – dut l setor turistich vegnissa metù en gran dificoltà. Per chest l conseier à sotrissà l’emportanza, tegnan cont ben segur de la situazion sanitèra generèla, de pontèr demez con l’ativitèdes de azet jà endèna la festes da Nadèl, temp da semper caraterisà da la prejenza de ghesć taliegn, tegnan cont che fazile ti meisc de jené e firé no podarà ruèr i turisć foresć.