La Usc di Ladins

I bie paesajes piens de neif enstadì l’é stat teater de na bela scomenzadiva de promozion turistica che à leà l’agenzia Ale Piva Production, con senta a Cervia e Milano Marittima con l Trentin. 

L manager romagnol defat inant la festes da Nadèl l’à portà a Cianacei n grop de modeles testimonial per fèr reportajes fotografics e prejenza sui social, ma chest’outa tel mond patinà de la beleza Ale Piva à volù ge meter ence l cher, troan lèrga per la solidarietà.

“Me é pissà che te chest an senester sie besegn de dèr n segne de vejinanza a la families en dificoltà – à dit l manager.” Per chest l’à cernù l Banco Alimentare del Trentin, che se cruzia de didèr chi che vif te na situazion de dejèje o de besegn, ence temporana, e l ge à donà na gran cantità de bens de prum besegn.

La scomenzadiva é stata voluda ence da la Union Hotels de Cianacei e Ciampedel, che pur te n moment senester per duc, en particolèr per chi che laora tel setor del turism, l’à volù renovèr chest apuntament con l’agenzìa romagnola per dèr n segn de speranza e de otimism.

Coscì, tel respet rigorous de la normes anti Covid, l grop de modeles da duta la Tèlia é ruèdes te Fascia per i servijes de promozion de nesc lesc de turism da d’invern e de dut chel che serf per poder fèr n muie de ativitèdes sa mont e su la neif, enceben che i impianc sie seré, desche fèr paslonch, jir con la cèspes, jir a pe o a ciaval. Ma apede chest les se à dat jù ence per dèr n aiut solidal.

“L’é stat dalbon n muie bel veder n muie de joenes se meter a la leta per didèr la persones manco fortunèdes - à dit Ale Piva – e poder moscèr che ence l mond del spetacol, de spes conscidrà a tort frivol e superfizièl, l’é rich de sensiboltà e de bon cher.”

Dedant a l'Hotel Dolomiti de Cianacei, a la prejenza de la familia Nicolodi, patrona de la Union Hotels, ge é stat consegnà l don ai raprejentanc del Banco Alimentare de Trent, che i à rengrazià l'Ale Piva Production per la bela scomenzadiva.