Federica Brignone la reìna de La VolatA

Data

28 de fauré 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
2^ Lara Gut-Behrami che venc la Copa de spezialità e 3^ Corinne Suter. Ju dal podie autra trei taliènes. Endèna la garejèdes doi burc azidenc a Kajsa Vickhoff Lie e Rosina Schneeberger
La é duta de la squadra talièna la terza giornèda de garejèdes de Copa del Mond de eles te Fascia.

La venjidora del SuperG su La VolatA de anché, domenia ai 28 de firé, l’é Federica Brignone. La sia l’é na garejèda prezisa, Federica la é ascorta a duc i mudamenc de percors descheche se l’aesse ben tel cef olache la cogn jir e olache la vel ruèr.

Coscita la svizra Lara Gut-Behrami cogn bele se encontentèr de la seconda posizion a più che mez secont de destach e sul terzo sciaier l’é l’autra svizra Corinne Suter a 7 diejemes. 

Per Federica Brignone l’é la 16^ venta te Copa del Mond, desche ela l’à fat demò Deborah Compagnoni.

Jù dal podie l’é autra trei taliènes: 4^ Elena Curtoni, per demò 6 centeisemes da la terza, 5^ Francesca Marsaglia e 6^ Marta Bassino.  

Col secondo post de anché Lara Gut-Behrami venc la Copa de spezialità de SuperG.

Na bela giornèda, con n ciel brun maraveous e l tempram giust, che purampò é stata roinèda da doi azidenc n muie burc. Dant la norvegeisa Kajsa Vickhoff Lie che la ciapa mèl n col e la loas su la porta vindò l la peta fora de sgol, no se ge destaca i schi e la rua dret te la rees. I omegn del socors rua sobito sul post e vegn chiamà l’elicoter per la portèr demez.

Mìngol dò ence l’austriaca Rosina Schneeberger la ciapa ite na porta a beleche 100 a l’ora che l la peta jabas, ence a ela no se ge destaca i schi e la rua dreta te la rees. Se sent i cighes per l mèl, desche pech dant ence con la norvegeisa. La garejèda se ferma endodanef, se pèrt dò mesora ma no la é fenida chiò. Sozede che ence n om che se cruzia de slizièr l portoi rue en schena via per jabas e cogn entervegnir i socorsc.

Doi burc azidenc che scuresc mìngol l bel resultat de Federica Brignone e de sia compagnes de squadra.

Per chel che vèrda la classifica da meter al luster l 10° post de la neozelandeisa Alice Robinson de cèsa a Soraga. L’autra atletes taliènes ruèdes al travert l’é Roberta Melesi 18^ e Teresa Runggaldier 40^. Nadia Delago, Federica Sosio e Laura Pirovano les sauta.

Se sera sù coscita la Copa del Mond de eles su La VolatA. Ma i apuntamenc de livel no fenesc chiò ajache la setemèna che vegn chest portoi ge darà alberch ence a la Copa Europa.  (mci)