Tel bilanz de previjion 2024-2026 aproà enstadì dal Comun de Sèn Jan l é ite n grum de lurieres e intervenc per l miorament di paijes de Pera, Poza e Vich, ma ence la projetazion de neve opere publiche. De chest ne à rejonà l ombolt Giulio Florian.
Coluns él i lurieres che aede en program te curt temp?
Un di prumes lurieres da far, che l é anter chi de maor prescia, l é l marciapé de Murada, che metaron a post sobito percheche l é gran besegn, l auter dì l é crodà ju ence sasc, cognon ge meter man per la segureza.
Dapò l é doi intervenc emportanc da far en prevenzion do chel che l é sozedù con l’agajon dai 5 de aost del an passà. Sun Sora Poza, sora le ciase olache l é vegnù ju chela gran roa, vegn fat na condota de aga averta che porta l’aga fin te ruf, n intervent da 3,4 miliogn de euro. E dapò vegn uzà l pont de Le Cercenade a jir te Gardecia per na speisa de presciapech 200 mile euro.
Tel bilanz l é ite ence l apalt per la rei de le aghe paze de Rancolin, 500 mile euro, e la iluminazion e l asfalt de strada de Tita Piaz.
Tacarà ite bele prest i lurieres per far la rei de le aghe paze che vegn ju de Bufaure e enveze per chela de Vael, che ence la é n muie emportanta, sion leé a la Provinzia che fasc l intervent, noi tel medemo scavo faron danef le condote de aga fin al bosserlait de Pontac e l Consorzie Eletrich portarà su la corente da 20 mile volt e la fibra otica fin ai refuges.
De più su La Usc stampèda de en vender ai 22 de mèrz. (Monica Cigolla)
Comun de Sèn Jan: Ciasa de la Musega e Le Arce
Tel bilanz de previjion l é ite na lingia de intervenc de ressanament e de miorament de strade, piaze e sot servijes. Anter le opere maore l é ence la restruturazion del fabricat de le scole a Poza e l portoi de Aloch.
Galaria retrac
View the embedded image gallery online at:
https://www.lausc.it/valedes-ladines/fascia/26763-comun-de-sen-jan-ciasa-de-la-musega-e-le-arce#sigProIdef2b22673a
https://www.lausc.it/valedes-ladines/fascia/26763-comun-de-sen-jan-ciasa-de-la-musega-e-le-arce#sigProIdef2b22673a