La Usc di Ladins

Dai 4 ai 8 de marz tel Piemont l é stat endrezà la XXXV edizion di Jeghes Nazionai da d’invern Special Olympics. A Sestriere e Pragelato l é stat le gare de schi, paslonch, brea e floorball, a Entracque (CN) l é stat le competizion de corsa con le ciaspe e a Borgo San Dalmazzo se à tegnù le gare de bal.

En dut chest an à tout part 593 atlec da duta la Talia e ence da foravia ajache l era ence valch delegazion da Austria, Germania, Letonia e Ungheria. Chest percheche l an che vegn sarà i Jeghes Mondiai da d’invern Special Olympics che per la pruma outa vegn fac belapontin te la Talia. 

Special Olympics l é n program educatif che endreza alenamenc e evenc dediché demò a le persone con desabilità inteletive e per ogne livel de abilità.

A le gare de schi à tout part ence n tous da Vich, Federico Vian, clasc 1999. Federico l é stat bon de se vadagnar doi oute l sćialin più aut del podie e de se meter dintorn al col adertura doi medae de or.

De chesta bela esperienza ne à contà soa sor Elena che la l à compagnà a Sestriere.

De più su La Usc stampèda de en vender ai 22 de mèrz.  (Monica Cigolla)