La Usc di Ladins

Enstouta – a despet del titol – lascion per n moment la botanica per rejonèr de toponomastica, argoment cernù chest an per l program de l’Aisciuda ladina. Defat i inomes de lech l’é tanta de perla preziouses, paroles desche cristai che conta la storia più veia e sconeta de na comunanza, chela che à sie fondament tel leam de la jent con sia tera, co la mère-tera.

Se sà ben, tropes de chisc inomes é jic fora, desfanté per semper te la moza del temp, etres per grazia é resté se no auter te veies scric e documenc. Ite per anter n’é de chi dassen misteriousc, per parbuda e segnificat; etres enveze i é belebon trasparenc, ma ence chisc vèlch outa à zeche de interessant da ne contèr.

Un de chisc l’é apontin Vara da le fior, inom che troon te na letra de Amadio Calligari, chela dai 16 de firé del 1889, olache l conta di ric che anticamenter i veies fascegn fajea sun Ciaslir e Col de Mé, con bai, cianties e beudes en onor de la divinitèdes da chi egn. Ló l’era la Ciaslea pagana, overa la »Cortina de chi feudi«, ló che no vegnia scaji nia regoet e i pré restèa nossec, ajache i cherdea »che chel pabol e chela fiea fosse agiocha (desche sacra)«. Emben – scrif Calligari – »chi ciampes i à amò valch inom da moet [per dir: neto ‘fora de cef’], per ejempie Ciamp Lucrea, c[iamp] Aro, Salù, Vara de le fior, v[ara] Sensinoj, ren Scupio et cet.«.

Podede lejer dut su La Usc stampèda de en vender ai 26 de oril.