La desgrazia de Massimo »Mamo« Crepaz. Deplù avizendamenc al cé de le associazion. L bust del Kaiser a Plaza Caterina Lánz, la storia rivalutada
Ai 4 de setember duta la comunité da Fodom a bu n sclai al cuor cánche l’é ruada la notizia de la mort per n inzident sul laour de Massimo »Mamo« Crepaz. L laoráva su per i pilons de la segiovia del Padon, cánche per gauje da azerté, l ciol ulache l eva taché l l a frënt davoche la segiovia l’ea piada via. »Mamo« l a lascé n gran vuot nte la comunité, ulache l eva trop empegné col grop dei alpini e l balon. Ma l 2023 s’a tout ence autri »fioi« de Fodom, che trop a fat per la val o che s’a fat cugnësce foravia proprio per la laboriosité tipiga dei fodomi. De jené da l’Etiopia l’é ruada la notizia de la mort, a 80 agn, de Padre Bepo »Tono«. Per 50 agn l ava laoré nte le misción del paisc de l’Africa, ulache
l ava fat su scole, gliejie e sgiavé poc da la iega e troc autri laour per deplù comunité e paisc. De merz se n’é ju ence Dario Crepaz, da duc cugnisciù come »Dario de Comune«. Na vita la sua, dedicada a desbrighé via cherte per l Comun e le associazion. Davò plù de 25 ntel ufize de canzelaria de Comun, Dario l eva jù a laoré prò la sozieté »Pordoi«. L eva sté ence canzelier o diretor nte varie realté del paisc: Azienda Soggiorno, Consorzio Impianti a Fune, Cai, Sci Club Arabba, Unione Sportiva, Union dei Ladins. De lugio, da l’autra pert del mondo, dal Perù, rua la burta nuova che n’a lascé ence Mario »Birt«. Pié via ntel 1968, l eva ju a laoré nte le miniere del Perù, ulache l ava fat cariera e deventé vizediretor general de le miniere de la firma ulache l laoráva, la Buenaventura, la plù grana del Perù. Gran desplajei, davò na burta malora, ence per la mort de Raffele »Raia« Crepaz. Maestro de schi, imprendidou e assessor nte Comun, l a dé n gran contribut al svilup e al ben de la val.
Deplù te la edizion del 5 de jené.
