La Usc di Ladins

I Carabinieri à dat sëura na jëuna de Sëlva. Co iela pa jita?
- De nuet danter n merdi ai 21 y n mierculdi ai 22 de auril, dala 2.20, à i carabineri udù doi jëuni che jiva a pe dlongia streda, de scur sambën. La forzes dl ordn se à fermà per fé n cuntrol. L jëunn che fova iló se n ie mucià tl bosch. La muta ie resteda iló, ma ti à dit n inuem fauz ai carabinieri. Un di carabinieri la cunesciova y savova nscila che la ova dit n fauz inuem, y ti à sun chëla damandà la cherta d’identità. Iló ti ie la muta jita permez ai carabinieri, "ti dajan de piesc y spudan", da coche l vën dit tl comunicat di Carabinieri.
Cun l auto dla Crëusc Blancia de Santa Cristina ie la jëuna de 18 ani de Sëlva unida meneda a Bulsan, ulache n ti à dat ite zeche per la archité.
La jëuna ie unida data sëura per na lingia de reac: viulënza, resistënza, manaceda, cumpurtamënt fauz y lejions de viers dla forzes dl ordn, pona per ne avëi n iede nia ulù dì si inuem y per avëi pona dit n fauz inuem, oradechël per detenzion de droga, n gram de marijuana, per cunsum persunel.

David Lardschneider

Foto: I carabinieri ntan n cuntrol.