La Usc di Ladins

Gabriel Kostner, de Urtijëi, pilot espert dl Aiut Alpin Dolomites, se à amalà de Covid-19 y ie ruvà tla terapia ntensiva. L conta de si cumbat per resté n vita y de si esperienza dramatica. L scrij de sé nstës, »nia per auzé ora mi persona,« coche l nes à dit, »ma per rengrazië de cuer duc chëi che lëura y juda te situazions scialdi ries, desmustran prufesciunalità y for nce na gran umanità.«

Dé pro che nce ie ne me l’é tl prim nia tëuta tan sterscia, nce sce tres mi lëur pra l Aiut Alpin Dolomites ovi cuntat cun dutores de prim aiut de Bulsan, dl Venet y dla Lombardia che me cuntova bele ntlëuta dla situazion nët nia bona ti spediei da iló. … Pona éi giapà la tos y minove bën dessegur che l se tratëssa mé de na nsferdida. Inant iela jita cun n mel ai osc, che ne me lecurdove nia che n pudëssa avëi tan mel. Pu nce sce l ie l coronavirus – me mpensovi – ne pòssel pu, per n ël saninton de 54 ani, nia vester auter che n tisl mpue’ plu sterch. Son stat a cësa, da maië me purtovi nchin dan porta. Mpue’ de pazienza y pona fóssel pa bën passà, ratovi. Ma l mel ai osc ne lasciova nia do, la tos univa for piecia y piecia y l me drucova dansù sun l fuià blanch. De nuet ne fovi nia plu bon de durmì.

I me à pona mena te spedel. Dodesc dis sons stat decà, zënza me n savëi o zënza me n capì dainora. Son ruvà tan inant che me mpensove che l ne se paia nia plu a cumbater, che d’autri muessa śën fé o nce nia y che śën ne dependòvel nia plu da mé.

Ti son recunescënt ai dutores y colegs che cunësce, dantaldut ala duturëssa capa dl Aiut Alpin che me ie stata daujin ntan dut l tëmp, a mi familia y tlo plu de duc a mi fra, che à cumbatù y à zitrà cun mé, nsci coche nce vel’ un de mi cumpanies. Recunescënt sons, che son restà n vita y che posse inò ti cialé a chësc bel mond, povester tosc inò da lassù ju.

L articul ntier ie tla edizion stampeda di 24 de auril.

Gabriel Kostner

FOTO: Gabriel Kostner te spedel cun coronavirus: »Dodesc dis sons stat decà, zënza me n savëi o zënza me n capì dainora.«