La Usc di Ladins

La biatleta de 28 ani de S. Cristina à śën d’auril dat la nutizia tres i social media che la stluj ju si cariera sportiva, che ti à purtà de bela sudesfazions.

Coche la scrij ie pratiché sport a n livel aut scialdi rie y se damanda truep da uni atlet, ma dal’autra pert te dàl la puscibltà de viver de gran emuzions, uniches. »Per mé ie l sport stat na scola de vita«, dìjela »y per ruvé a n cër livel éi messù madurì, cialé ite te mé nstëssa, per ti vester a mi deblëzes y tëmes. L sport me à dat truepa sensazions che ne desminceré mei. Ma śën sons ruveda sun sëida de mi forzes, sibe sportivamënter che umanamënter, per pudëi inant dé l mascimo te chësc sport.
Perchël éi tëut la dezijion de lascé l sport agonistich, cuntënta y segura de avëi dat dut chël fove bona de dé.« Nsci à Alexia Runggaldier, atleta dla grupa sportiva dla »Fiamme Oro« mutivà si dezijion de se tré zeruch dal sport agonistich. Deberieda cun ëila ons nsci mo fat n pitl viac tres si cariera sportiva, cun na ntervista.

Alexia Runggaldier: La majera sudesfazion ie sambën stata la bedaia pra i Campiunac dl Mond a Hochfilzen tla garejeda ndividuela, ma dant mo, for tla medema sajon, l terzo plazamënt te Copa dl Mond a Antholz y n ultima mo la bedaia d’or tla stafeta de Copa dl Mond a Hochfilzen. Dantaldut ti ani 2016 y 2017 me àla scialdi butà, a pensé che l ann dant ovi belau manacià de lascé.