La Usc di Ladins

La Nëus Jëuni Gherdëina fej l pont dla situazion per coche la ie al mumënt cun l lëur per y cun i jëuni:

I locai di jëuni dla valeda, l Saut a Urtijëi, l Puliné a S. Cristina y l fun&more te Sëlva, à messù dsaré da n juebia ai 5 de merz inant. L ufize dla Nëus Jëuni Gherdëina NJG à stlut la portes al publich n mierculdi ai 11 de merz.

L ie scialdi mpurtant che l cuntat cun i jëuni reste mpo inant ntan chësc tëmp de ijulazion, davia che tan truep jëuni univa regularmënter uni di domesdì ti locai. Perchël pitons śën uni mierculdi y vënderdi domesdì nosta ancuntedes online. Tlo se ancuntons cun i jëuni per fé juesc d’uni sort, ma nce per s’la ciaculé y per ti sté daujin te chësc tëmp de ijulazion

Co stàla pa cun l proiet da d’instà SAKL?
La iscrizions fova bele online ala fin de merz. Chëles à drët butà, iló se àl scrit ite, per la 14 enes che on a despusizion, passa 150 mutons/ ans de duta la valeda. Tlo saràl śën da udëi sce l program udù dant puderà unì fat o no, sce l sarà da fé plu de pitla grupes, sce n possa nce jì dedora dala valeda o tla nudadoies… Nëus son for n cuntat cun l’Agentura per la Families, l Ufize per la Junanza, l AGJD y la rë, per valuté cieche l sarà da fé. Nëus speron dassënn de pudëi tré tres l proiet cun, sce l ie debujën, vel’ pitl mudamënt de program.

Per l daunì se ncunfertons inò da stramp a saludé i jëuni te nosc locai y sustenì la lies che lëura tl ulentariat cun n gran mpëni de solidarietà.

L articul ntier ie tla edizion stampeda di 30 de auril.

Per la Nëus Jëuni Gherdëina, Karin Rabanser

Foto: L proiet da d’instà SAKL. N spera dassënn de pudëi tré tres l proiet cun, sce l ie debujën, vel’ pitl mudamënt de program