La Usc di Ladins

La trëi direzions dla scoles autes ladines te Südtirol resta inant per cin’ ani. Chël uel dì che l resta inant la doi direzions de scola auta te Gherdëina. Na bona nutizia, che on nce bele respurtà sun La Usc.

Cumpëida di nsenianc
La Jonta provinziela de Bulsan à oradechël mo deliberà la cumpëida di nsenianc per dui trëi i livei de scola. Per i proscimi trëi ani« iel unì fissà la cumpëida de stieres dl personal nseniant tla scoles dla valedes ladines cun de ndut 323,60 stieres, tla scoles tudësces 5.789 stieres y 1.871,75 stieres tla scoles talianes. Fej ora dut adum 7.984,35 stieres de personal nseniant te Südtirol.

L proporz lascëssa pro zeche deplù
A tenì ite l proporz, che ie una dla majera seves de nosta Autonomia, à i ladins rejon de 361,7 stieres, che ie 38,1 stieres deplù de chël che l ti ie unì recunesciù tres l plann de trëi ani permò deliberà. Cun passa 38 stieres deplù savëssa la scoles dla valedes ladines dessegur cie fé. Per ntant resta la partizion dla stieres dl personal nseniant nscila. Per trëi ani alalongia ne se lascia la partizion dla stieres dl personal nseniant nia mudé.

Valivé ora tres mesuns finanziei
L ie dal’autra pert n argumënt chël de cuantifiché i scioldi che la scola ladina messova giapé de rejon sce n giapova 38,1 stieres deplù, per pertënder la fëta de tëurta de bilanz sun mesura tres la lege finanziera y bilanz dla Provinzia che vën fata da ann a ann. Mo plu scëmpl: tant costa pa 38,1 nsenianc al ann? Chisc scioldi giapa la scola ladina deplù, uni ann.
Sce n cajo, sce la unissa ala dures, pòssen monce fé valëi i mesuns finanziei che ie jic perdui ti ani passei tres chësc manejamënt che ne se à nia stizà avisa sun l proporz.

Chësc ne n’ie nia mé numeri y scioldi. Dovia iel la didatica, la furmazion de nosc jëuni tla valedes ladines, l daunì de nosc jëuni.

Tla edizion stampeda di 30 de auril iel mesun liejer dut l articul.

David Lardschneider

FOTO: L ITE Raetia a Urtijëi.