La Usc di Ladins

Ntëur n trënta stories per pitli, y ciuldì pa no nce per granc, iel ntant da garat sun la plata internet dla Union di Ladins de Gherdëina. Da scuté su y nce da cialé.

Messan te chësc ultimo tëmp sté scialdi a cësa, pervia dla crisa dl coronavirus, òven y àn plu dl’aurela per d’autra cosses che zënza. Genitores cun mutons muessa se dé ju deplù cun ëi. N se tol plu dl’aurela de liejer y de liejer dant. Nsci iel nasciù l’idea de cunté stories nce per d’autri mutons, de les tò su y les mandé inant tres i social media, acioche nce d’autri posse les scuté su. Cossa drët bënunida te chësc tëmp che monce la biblioteches ie stlutes.

Na scumenciadiva de Isabella Mussner y dla Union di

• 
•  

View the embedded image gallery online at:
https://www.lausc.it/valedes-ladines/gherdeina/12607-te-conte-na-storia-per-ladin-tl-temp-dla-crisa#sigProIdb20b1e79df

Ladins de Gherdëina
A chësta idea se à tacà ite Isabella Mussner, de Sëlva, oma de doi pitli mutons, che à giapà na tel storia dal’Austria ite y se à pona mpensà che l fossa bel a mëter a jì vel’ da de tel nce tlo, per ladin. Davia che Isabella Mussner ie nce te cunsëi dla Union di Ladins de Gherdëina, àla purtà ite chësta idea nce tlo. La presidënta Sofia Stuflesser fova scialdi ntujiasta de chësc y à nsci mandà nce tres la ULG l nvit a fé pea y cunté na storia per chësc tëmp che n muessa sté a cësa.

Da udëi y/o scuté su sot a www.ulg.it.
I pitli videos dla stories abinedes adum àn pona publicà sun la plata internet dla Union di Ladins de Gherdëina, www.ulg.it.
Ntant n iel bele ruvà ite ntëur n trënta, y l ie bel a udëi tan d’uni sort che l n ie y de tan manieres desferëntes che n se à nuzà per les cunté. L ie propi mpue dldut, da scuté su, ma nce da cialé.

N arichimënt nce n cont dla rujeneda, che à plajù dassënn
L ie deventà n proiet criatif dut ntëur. N à giapà i cumplimënc tres facebook y a usc, y pitli mutons à bele scumencià a dì do y cunté do la stories. N à pudù cunstaté nsci che l ie nce n arichimënt per la rujeneda, dantaldut per i mutons che ne n’à nia tan ucajion de audì stories cuntedes per ladin.
La scumenciadiva ne fina sambën nia tlo y inant ie duc chëi che à vel’ idea, vel’ blòta storia da cunté, vel’ rima da dì su, nviei a mandé ite si cuntribut. N possa se lascé tumé ite dldut. Coche l ie da fé y cunsëies n chësc cont iel nce da giaté sun la plata internet dla Union di Ladins de Gherdëina, www.ulg.it, ulache n puderà inant jì ite a ti cialé a duta ch’sta blòta stories.

FOTO: N valgunes dla stories che ie da pudëi udëi y scuté su te internet, sun la plata www.ulg.it.