La Usc di Ladins

Do la stluta pervia dl coronavirus àn śën bel plan inò pudù scumencé a lauré. Berstotes, butëighes, ustaries y d’autri servijes à inò giaurì y trueps ie cuntënc che i possa inò jì de reviers sun si stiera de lëur. Cun truepa mesures de segurëza per schivé che l virus se slerge inò ora, cëlen de ruvé de reviers a na cërta normalità. La jënt y l’economia n à de bujën

Danz che normalità ne n iel mo deguna. Sce de un n viers iesen cuntënc de pudëi jì sun l lëur, vëniel su dal’autra pert, per la families y chiche à mutons, l problem che chisc resta da sëui a cësa ntan che i genitores lëura. Sce l vën śën nce giaurì scolines y scoles per n valguni, réstel la dumanda coche fej duc i autri y coche n fajerà ntan i mësc da d’instà.

Mutons a cësa y deguna che ne cëla de ëi
La problematica ti ie unida purteda dant ai uemes de politica, ai aministradëures de Chemun y ai Servijes Soziei. La Scumenciadiva di Genitores dl Südtirol y la Scumenciadiva per mëter adum lëur y familia te Südtirol à metù a jì na petizion da pudëi sotscrì online, cun ghiranzes y prupostes per families cun mutons, »ajache zënza assistënza ne possa truep genitores nia jì a lauré y sce l mancia la forzes de lëur, co dëssa pa pona muever inò l’economia?«, chësc scriji nce tla petizion, che aldò de ëi dëssa nce vester n aiut ala politica locala per ntënder i bujëns y pudëi pona mëter a jì pruvedimënc aldò. N se à dat ju y se dà ju dassënn, almanco a livel istituziunel, cumenel y provinziel, per crì soluzions a chësc problem.

Ancunteda dl FamiLiam
FamiLiam ie na scumenciadiva che ie unida metuda su bele l ann passà a livel de Gherdëina, cun reprejentanc de duc i chemuns dla valedes, dla istituzions de furmazion, sozieles y de lies che à da n fé cun la families. FamiLiam ie propi unì metù su per se cruzië dla cuestions y dl bën dla families. Iust tl scumenciamënt dl’ena passeda se à chisc reprejentac abinà te na videocunferënza per se rujené coche n pudëssa fé per ti judé ala families te chësc tëmp de crisa, dantaldut per chël che à n fé cun la assistënza di mutons.

No mé i granc, ma nce i mutons ie te na situazion ria
I mutons ie bele da doi mënsc incà a cësa, cun puecia y deguna pusciblteies de cuntat cun d’autri de si età. Nce chësc ie unit ora tla ancunteda, nes conta l’assessëura per l soziel dl Chemun de Urtijëi Martina Comploi.
»L ie rie urganisé zeche te chësta situazion de melsegurëza, ulache ne savon nia cie che messon se aspité, l ie mesures saniteres da tenì ite che strenj ite uni atività. Ma ulon y messon cialé de ti pité velch ala families, sambën tla majera segurëza che l ie mesun«, dij Martina Comploi. La gran pert à bele finà su si feries chëst ann y ne n arà nia plu de sëurora per d’instà. Coche n s’la metova a jì i autri ani, ne jiràla nia plu, da nëinesc y laves ne pòssen ënghenó plu drë mandé i pitli. Tant y co che n sarà boni de urganisé la scumenciadives per d’instà coche l Pavël y l SAKL ie dut mo da udëi. L semea che dut toma tl’ega y la families ie veramënter stendetes.
Uni aministradëur ie sëuraciarià de dumandes, che l se fej y che n ti fej, per judé ora de chësta situazion. Da una na pert uelen fé zeche, dal’autra pert iel scialdi rie pité velch che posse cuntenté la dumanda y i bujëns.

Al mumënt vàla de aspité y pona sce n cajo de fé aslune. A udëi coche la sarà te vel’ ena do che n à giaurì truepa ativiteies, sce n puderà lascé do la normes plu restritives y avëi plu lidëza per nosc mutons y jëuni, plu sauridanzes per nosta families.

L articul ntier tla edizion stampeda di 15 de mei.

UK

FOTO: Tla biblioteches iel mesun passé tëmp liede, ma ativiteies cun de majera grupes ne pòssen danz nia fé.