La Usc di Ladins

Da pert di uperadëures dl turism de Gherdëina iel unì metù a jì na ancunteda via internet per stlarì cuestions daviertes n con’ dla mesures de segurëza che ie da tenì ite per chiche fita via majons o cuatieres.

L’ancunteda ie stata n lunesc domesdì, ai 18 de mei. Bele dant ova chiche ulova l mesun de mandé ite dumandes scrites, pona fòvel l mesun de fé dumandes tres chat ntan l’ancunteda y pona nce diretamënter tres video. L ie unì tratà plu tematiches, la cuestion dla netijia y dl dejenfeté, l mascherot y la manëces, la destanzes, la regula dl 1/10 y d’autres. Repurton tlo dessot n valgun ponc tratei.
La doi muderadëures Christina Demetz dla Lia dl Turism y Ellis Kasslatter à saludà i esperc de segurëza y de dërt y na bela cumpëida de osć che se ova cunlià per l’ucajion.

L vel la regules plu sciorfes
Per Südtirol iel unì stlarì che la Provinzia possa mé dé ora regules plu sciorfes che no a livel statel, mé per dì chëla data ora dla destanza danter jënt te sales ulache n maia y te locai ulache n sta deberieda te strutures turistiches, y che ie de doi metri te Südtirol, ntan che l Stat vëija dant te chësc cajo de sté mé un n meter de zes. L vel nscila i doi metri dla Provinzia, per ntant almanco. Dala categuries di setores desferënc ti iel unì metù a cuer ala Provinzia de fé valëi la regules plu lerges dl Stat, canche l ie mesun. Chësta regules plu sciorfes ie sautedes ora ajache la Provinzia de Bulsan à fat na si lege dan la regulamentazion nueva dl Stat.

L raport danter metri cuadrac y persones
Coche nce bele repurtà tla ultima edizion de La Usc di Ladins, vel la regula dl 1/10, che ie una na persona per diesc metri cuadrac, mé per la sperses da nuzé deberieda, che possa vester na sala dla televijion, na biblioteca, na nudadoia dedora, la »hall« de n hotel, y nia per la majons y i cuatieres.

Te majon o cuatier mé families o cunvivënc
Una na regula da tenì ite ie chëla che mé chëi de familia o cunvivënc possa sté deberieda te na majon o te n cuatier. Nce tlo sàutel ora che l ie zeche de dlicat dal pont de ududa dla privacy. Ma da pert dla Lia dl Turism vëniel mpo dat l cunsëi de scrì bele tla e-mail ulache l vën pità na majon o n cuatier, o al plu tert tla e-mail de prenutazion, che per lege pòssel ite te majon o te cuatier mé jënt che cunviv regularmënter, se damandan che i tlienc scrije che l se trata efetivamënter de familia o cunvivënc. A chësta maniera dàn ju respunsabltà, scencajo che l ëssa da sauté ora zeche.

L articul ntier tla edizion stampeda di 22 de mei.

David Lardschneider

FOTO: Christina Demetz y Ellis Kasslatter à menà tres la ancunteda online.