La Usc di Ladins

Ponc de ududa mustrei su dal Lizeum d’Ert Cademia y dala Scola prufesciunela per l artejanat artistich de Urtijëi. N ressumé de lëures y proiec fac via per l ann de scola. Da udëi mo nchin a n dumënia ai 31 de mei.

L ne n’ie nia stat n ann de scola coche n auter, chël da chëst ann, davia che per gauja dl coronavirus àn messù stlù la scoles passa trëi mënsc dant. Truep proiec ie nsci restei a mesa streda, nia stluc ju defin, truepa prejentazions – tlo y oradecà – ne n’à nia pudù unì fates. N à messù, do la stluta dla scoles, se cunzentré sun l program essenziel ajache sculeies y maestri fova y ie a cësa.
Mpo à la Scola d’Ert y la Scola Prufesciunela ulù cialé de fé almanco una na mostra per prejenté, coche da tradizion, i lëures fac tla sezions desferëntes, de scultura y pitura decurativa dla Prufesciunela, de grafica, design y ert figurativa dl Lizeum d’Ert.
La Lia Mostra d’Ert/Circolo ti à dat la puscibltà, judan a mëter a jì la mostra tla sala a Urtijëi sun Plaza de S. Antone.

Giaurida virtuela, ma mostra da pudëi vijité de n valguni al iede
La giaurida ie chëst iede unida fata te na maniera virtuela y mo śën possa duc i nteressei jì a ti cialé sun youtube videos Lizeum d’ert Cademia. Chësc per la gaujes che savon, che l ne possa nia se abiné de majera grupes de jënt.
Coche l presidënt dla Lia Mostra d’Ert, Fabio Perathoner, à dit tl video dla giaurida, n sada ai 23 de mei, à l Lia tëut su gën l nvit dla cunlaurazion cun la scola y l ti sà scialdi bel de pudëi ti dé la puscibltà ai sculeies de lascé udëi si lëures. Perauter ie chësta nce inò la prima mostra tla sala dl Circolo do la situazion particulera che dut fova stlut su y fërm pervia dl virus. Doi mostres àn te chësc tëmp bele desdit.

Ala mostra tla sala dla Lia Mostra d’Ert a Urtijëi sun Plaza de S. Antone pòssen mo jì a ti cialé nchin n dumënia ai 31 de mei, for dala 10 ala 12 y dala 17 ala 19. Aldò dl decret dl Guviern possa la mostra unì vijiteda mé te na cumpëida limiteda de al plu cin’ persones al iede.

Deplù tla edizion stampeda di 29 de mei.

UK

FOTO: Stuei decurei dai sculeies dl Lizeum d’Ert, che dëssa ruvé tla Cësa dla Solidarietà a Persenon.