La Usc di Ladins

Biesces mortes sun Stevia, zaredes dal lëuf, ma povester nce dal sciacal. D’autra biesces ie restedes n vita, do che les ie unides morses. Les ie vives ma patësc dassënn.

La parola al biologh: lëuf o sciacal?
Iacun Prugger, biologh, à cumpanià la Usc di Ladins sun Stevia, per jì a ti cialé ala ntraunida dla biesces zaredes. Publicon tlo n valguna reflescions de Prugger n con’ de cie chël che l ie suzedù sun Stevia cun la biesces:

L ost Toni Ploner de Stevia miena che l se trate, pra la ntraunida de chisc dis, de n sciacal (sciacallo dorato, Goldschakal, Canis aureus), nce ël parënt dl cian. Davia che l ie n tier che vën dal raion mediteran ie l’autëza de sëura 2.300 metri sëura l livel dl mer de Stevia scialdi auta per chësc tier, che à plu gën raions plu ala bassa. L fossa bonamënter la luegia plu alauta dl’Europa ulache l ie unì udù. Ma n muessa nce dì che i sciacai se sposta tresora. L sciacal ie n neozoa che vën dal est te nosc raions y se sparpanieia ora debota. Truep tieres ie nce bele tl’Austria y tla Svizra. L ufize cumpetënt de Bulsan dajerà ora ti mënsc che vën na publicazion cun nfurmazions plu avisa n con’ dl sciacal te Südtirol. Ma n sà che l ie plu families che s’la śira te Südtirol.
Ti ultimi doi ani àn cunstatà for inò che l n ie tlo da nëus: suinsom Puster, sun l Sonnenberg tla Venuesta, dlongia Sterzing, dlongia Persenon y te d’autri luesc. L sarà da aspité sun la nrescida genetica, per udëi sce l lëuf o l sciacal à la gauja, sun Stevia.

Vel’ cunscidrazion ntëur al lëuf
Zënzauter se damànden ce sort de tier che à zarà la biesces sun Stevia. Davia che chësc tier à lascià n vita vel’ biescia, la tichenan mé zënza la mazé, ne fòvel bonamënter nia n lëuf bele chersciù ora; n tel ëssa bonamënter mazà duc i tieres. N lëuf nasciù chëst ann – ala fin de mei nasc i lëufs – ie bonamënter mo massa pitl per fé n tel dann. N lëuf nasciù l ann passà à bonamënter mpo bele na cërta esperienza y ëssa bonamënter mazà duta la biesces.
I lëufs dl raion dolomitich vën dantaldut adalerch dala Pre-Elpes, dal raion dla Lessinia y de Asiago. Truep pitli che nasc iló va a crì revires nueves y capitea pona tla Dolomites. Tlo sta pona cërta grupes n pez, se n va, l n vën d’autres, vel’un vën mazà nce sce n ne pudëssa nia l fé, y pona se n va la grupa. Per la dì n curt: i se muev tresora. Per ejëmpl ova n lëuf che fova sun Mont de Sëuc l’oma de Paneveggio y l pere dla Lessinia, i doi lëufs pere y oma se ova ancuntà te Fascia.

L lëuf te Südtirol: vel’ da cumpëides
I dac che repurton tlo ie tëuc ora dala documentazion ufiziela dla Provinzia Autonoma de Bulsan. De ndut iel unì cunstatà te Südtirol tl 2019 danter 31 y 35 lëufs. Te dut Südtirol à lëufs zarà 92 biesces y 19 cëures tl ann 2019. Tl ann 2019 iel stat 174 senialazions de lëuf (Canis lupus). Ala fin dl 2019 fòvel bonamënter 4 de majeri rudli te Südtirol y ntëurvia: un suinsom dla Val de Non – Deutschnonsberg (dal 2016/2017 incà), un ntëur Reba, y pona te Fascia, tla Val Badia (dal 2017 incà), un a Lujon, Redant/ Rodeneck y ntëurvia (dal 2019 incà) y un ala fin dla Val de Martell/ Maddalene (dal 2019 incà).De ndut iel unì dat ora 27.533 euro per i danns fac dal lëuf.


Iacun Prugger

Deplù tla edizion stampeda di 11 de setëmber.

FOTO: Ntan l sëuraluech istituziunel. Foto de Flavio Puciacia