Mo i n’ess mai ponsé che con sora i 60 essi endô ciafé en te’ castigo, mo en cösc iade ince mi compagns, y lapró scialdi dötes les porsones dal monn.
En cösc iade édl ben cotan atramonter da sté a ciasa en castigo: sté dalunc dai atri, se iestí na maschera o en fazorel, se laé gonot les mans sc’te brances ete val’, y ciamó trep d’ater por te stravardé dal virus Corona y Covid-19.
Por fortüna pón ciamó comuniché, telematicamonter, al fonin, se scrí mails, whatsapp, se mené filmac, scuté radio o odëi la televijiun y d’ater.
Cösc se dëida
View the embedded image gallery online at:
https://www.lausc.it/valedes-ladines/val-badia/12381-ste-a-ciasa-en-castigo#sigProId4b9be63164
https://www.lausc.it/valedes-ladines/val-badia/12381-ste-a-ciasa-en-castigo#sigProId4b9be63164
Por mangiaria n’án ciamó bria da avëi tëma, al te vën cinamai condüt a ciasa, medejines y d’ater por i trec debojügns, vëgnel fistidié polito.
En gran iolan ai doturs, infermiers, istituziuns volontares o nia, lauranti co mëssa laoré por cosses d’ütl por la populaziun.
Trec ne röa nia plü a ciasa, nia passé i confins, fliegri chic, mobilité co bazila, rio da roé ennant.
Mo chi co se stá sogü le plü mal tal dolur, chi co á pordü en familiar, en gran compagn, en amich, sonza podëi jí a le ciafé i gnanca podü scuté so ultimo dejider, o i dí na ultima parora de confort. Na gran soferënza.
Mi familiars, iu, y dötes les porsones co á ciamó la sanité, stun a ciasa, se inventun val’, dun da mangé ai tiers, jun a muje, romenun sö, ciamó en iade, cojinun, fistidiun o ci co mai, con la speranza da romagne sagns, por podëi endô s’encunté, se dé la man y s’abracé.
Daurí danö nosc orizont, con na vidlada tlera, con en rapport umann y sann, odëi tla natöra to dio le maiú, fá gní sterch le respet, cambié magari val’ cosses, por le bun dal’umanité.
Vigne mal é bun por val’!
Cösc gnea belo dit laota.
Alexander Dalplan, ai 1. d’aurí 2020