La Usc di Ladins

Les respostes dla Rubrica dl Stomat Nr. 2, publicada dan otedé

1) Cristl da Ras a Al Plan ê n striun fat, cotan temü dala jënt, deache al ê bun da fá laurs de morvëia cun sü strinëc. Al â inzai stlüt n contrat cun le malan: sce al i dess na gran forza da rosedé o da trá fora legnuns, da sciuré incërch crepuns, spo ciafass le malan süa anima canche al mör 
2) Ala möria i dijon ince la mort foscia, deache chël che la á, á sura döt le corp de bur flec, golbri fosc da mercia. La möria é na maratia che se taca saurí 
3) La vila da paur Val sura Al Plan fajô dandaía pert dla signoria de Tor a San Martin y porchël i dijon Val dla Tor. Al vëgn cunté sö chisc mesc: Pradüc, Stofl, Cone da Val, Iun, Majuns, Ianesc y Miara 
4) Somür (sot le mür de cortina) a La Pli de Mareo vëgn bele dant dl 1700 sciöche ustaria, ci che ara é romagnüda cina dala Secunda Vera. L’ultimo ustí é sté Lois y Moidele Ellemunter dal Pinter, la ustaria é spo rovada tles mans dla ENTE. Tratan la vera él sté scora tla ciasa Somür, spo ésera jüda vonüda 
5) Razuns é na vila cotan sura Badia sö dlungia tru da jí da Valgiarëi sön Armentara. Al viô naota trëi families lassö. Ara é stada abitada cina ai agn 1950 
6) Le prou salesian dr. Mons.Nazio Canazei (1883 -1946) de Badia á studié tl Vinzentinum y dedó jö por la Talia. Al é gnü prou dl 1909 y rové dl 1912 tles misciuns tla Cina y é gnü consacré vësco dl 1930. So pere ê de Tifonara/Runch sura Pedraces y süa uma de Borbeles 
7) Frincené é n jüch di mituns; da jí a scora d’aisciöda y d’altonn se tolôi para na gaiofa o n carní de scisciores/sciéssores (de pices cogores de spidl, de arjila o de cop) che ai messâ toché tla coa ia por tera; chësc orô dí frincené o sciscioré 
8) Le maurigo é le paur che ciara sura les munts; al vëgn metü dal comun sön proposta dla lia di paurs o interessënza dla munt; al mëss chirí le famëi de munt 
9) Na picia ora a pe daite da Al Plan röion tres Ciamaor pro le Le dla Creda. Le lech ê gnü stöé da na morena y l’ega s’â abiné sö. Dandaía tolôn fora dal lech cialc, crëda che an adorâ da sblancoié mürs no ma de dlijies; porchël l’inom Le dla Creda. Le funz dl lech é gonot stlaurí, blanch sciöche crëda 
10) Le fumere fej föms che é cordes de coran che le paur adorâ da mené tera, da lié ciaries de fëgn; al fajô ince föms y ciaestri por les ciampanes che gnô sonades a man. Le fumere fej scoriades da jí a vardé, loastrich y ciavazes por i ciavai, juntles da lié linzios da fëgn y na ciaria de fëgn sön la cracia, rëfla. Na pert di fumeri jô sön les störes y vá ince söl marcé a vëne föms 
11) Daite da San Ciascian áldel na tofla cun la scrita »Predeví« impede chëra dal inom »Armentarola« che é l’inom de n hotel 
12) Le vëndres dan segra da La Pli vá i jogn d’Al Plan ia La Pli a tlocheré, a petlé crafuns; le medemo fej i jogn d’La Pli le vëndres dan la segra d’Al Plan 
13) La ciasa Runcher a Badia recorda le gran componist de Badia Jan Batista Runcher (1714 – 1791) che é sté 40 agn orghelist tl dom a Trënt 
14) Ciapí de stran fajô checossí, la gran pert dles ëres, jones, umes y laes; ares messâ tó stran de manes de siara strusciades. I ciapí gnô tuc dales ëres da jí alaleria a lauré por se paré dal gran cialt 
15) Pestacia é na gran litiria leria cun strasoch de stran da dormí por 2 – 3 mituns; por avëi plö saurí lerch stô un gonot te pestacia cun le ce jöpert. Ince geniturs dormî dandaía te na pestacia. Pestacia é ince n stromënt musical 
16) Do Rü d’La Pli da Frena demez a Parancia cina Framacia êl chisc morins: de Plaza, dl Ombolt, d’La Costa, d’Laronz, da Cianoré, da Morin, de Moz y de Soratrú 
17) Santa Berbora straverda dal tonn, é patrona de chi che é en punt de mort, di minadus, di Stodafüch, di artilerisć, di coraciampanes. Süa festa é ai 4 de dezëmber. 
18) Da San Ciascian ite röion a Predeví, an vá da Sciaré iteissö por Plan dala Pastüra, inant por Plan dal’Ega y spo pëion sö por la serpentina sfadiosa arjunjon Col de Locia che dá na bela vidlada foraijö cuntra San Ciascian y na ciadëna de crëps. Chi che vá inant röia te Gran Fanes 
19) La maestra Anna Campidel (1900 – 1971) da Larcenëi a Badia á fat sö la ciasa Notburgaheim a Bornech por i dé cuartier a mitans che studiâ o laurâ. Süa uma ê na so dl pater da Oies 
20) Impede l’inom San Ciascian por le paisc vëgnel dant ti bragamins, ti documënc vedli za. cina al 1850 l’inom Armentarola. Incö é Armentarola ciamó l’inom de n mesc da paur daite dala dlijia 


Informaziuns implü ciafëise te chisc libri 
B. Richter – L. Santifaller: Die Ortsnamen von Ladinien. Innsbruck, 1937 
Flus de Munt: Uniun Maestri Ladins, 1967 
Lidia Zingerle y d’atri auturs: La Val – Uniun di Ladins Val Badia, 1974 
Angel Dapunt: Badia, Uniun Ladins Val Badia, 1979 
Anton Steinhauser: Die Gerichte Buchenstein und Thurn a. d. Gader 1500 – 1590. Istitut Ladin, 1979 
Paul Videsott y d’atri auturs: Al Plan – Storia y vita dl paisc, 1993 
Lois Trebo: Usanzes, liëndes y tradiziuns. Istitut Ladin, 2003 
Edi Pizzinini y d’atri auturs: Eghes d’Al Plan, 2013 
Nosta Jent, Union Generela di Ladins dla Dolomites, 2005

Domandes y respostes metüdes adöm da Lois Trebo