"Metun averda, che i ne sun nia ciamó sura munt ia!"

Data

25 de auril 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L primar dla anestesia y terapia intensiva tl Spitol da Bornech Marco Pizzinini fej n pröm bilanz dla gestiun dla pandemia y nes cunta de esperiënzes mai vites denant
Dan da n mëis y mez á metü man le monn da se rodé atramënter, tla vita publica y te ciasa de vignun. I pröms infetá cun le coronavirus gnô isolá te ciasa y – ti caji plü prigorusc – mená te spitol. Dai pröms tests incá é feter cënt tla Val Badia gnüs detlará "positifs". Da döes edemes incá vá chisc numeri söpert a na manira pegra, mo porchël n’é la Val Badia sëgn nia lëdia dal coronaviurs y fora dal prigo epidemiologich. I s’l’ún cuntada cun le dotur y primar Marco Pizzinini.

La Usc: Dotur Marco Pizzinini, co se vara pa?
Marco Pizzinini: "De sanité me vára bun, iolan! Ince la situaziun tla gestiun de Covid-19 te reanimaziun te nosc spitol é miorada, i caji é por fortüna jüs zoruch. Chësc é n trend che vëgn registré sides tla Talia co te nostes realtés. I messun indere ince dí che al é dötaurela ciamó tröc paziënc manco gravi te nüsc spitoi, y che i ún situaziuns nia saurides te ciases de palsa te Puster. Gran pert di caji de maratia é chiló saltá fora les ultimes edemes y i ne podun nia dí che le piec é passé."

...

Al é tres ciamó jënt che la tol ala lesiera.
"Scebëgn che la percentuala dla maratia y di defunc é dorata bassa chiló da nos, mëssi dí che chësta maratia pó ester dër prigorosa y grave. Iö cunti ma de ci che i á vit söla pel. I ún albü ince jënt jona te reanimaziun, cun de gragn problems, y i savun che chësta maratia pó fá de gragn danns ai fiá blanc. Bagatelisé vëgnel ma ci che an ne conësc nia. Basta gní mez n de te spitol y odëi ci che al sozed, spo ciafa ince la jënt plü scetica n’atra minunga. I mëssi dí che te 30 agn che i laori te spitol n’ái mai odü val’ de te’: tan de posoch, de prigorus, desoferënt."

Os dijëis ince che i sun stá cina sëgn stravardá dal piec?
"I arati che sce la cossa se röia chiló, unse albü na gran fortüna!"

La sora rezeta é donca sëgn da convire cun le coronavirus?
"O da le tigní isolé le plü che ara vá. I ún imparé dala Cina che les porsones infetades él miú da curé bun bele a ciasa, che al é da fá tests assá incër i bordiguns ia... Al é dessigü ince la poscibilité che na te’ pandemia – sciöche al n’é sté d’atres ti agn passá – sparësces da sora do da n pez. Mo chësta é na speranza! Sce te vëighes la jënt atempada te na ciasa de palsa che mëss morí por chësta maratia – do na vita de laur, pënseste sura. I viun tl 21ejim secul, i messasson avëi vigni soluziun, mo ara n’é nia insciö. L’esperiënza che i feji sëgn me mët dër da ponsé. Y i ne sará nia ma iö che i pënsi!"

L’intervista intiera podëise lí do tla ediziun stampada atuala y söl e-paper!  (Iaco Rigo)