La Usc di Ladins

I sun dan ala festa y la vacanza cörta de Pasca de Ma. Mai desco en chësc ann ciáron da sté a ciasa (y nia jí a Jesolo o Rimini) por se organisé por la sajun da d’isté, che sará desferënta dai agn passá. I s’l’ún cuntada cun le diretur dl’AT a La Ila. 

Dir. Bernardi, ci podëise pa nes dí dl interes di ghesć por na vacanza tl’Alta Badia? 
Jan Paul Bernardi »Ara vá bun, i mëssi dí miú co ci che i ponsân. I ún bele albü atenziun y domandes. I messun capí che i gnun fora de na previjiun dorata negativa, cun malsegurté y demotivaziun. I pó dí che al sará po ma feter düc che dauriará chësc isté, al plü tert por la fin de jügn. Al é n movimënt che nes dá confort y otimism.« 

Ci numeri podëise pa comuniché? 
»I n’ún abü plü o manco 600–700, döt adöm por telefon y e-mail. Lapró n’él nia les domandes che sará gnüdes tres i socials. Chëstes zifres manifestëia n pü’ le trend. Y dij ince che dantadöt les regiuns dlungia nos á interes da gní. I mëisc chiris le plü al momënt é messé y agost, mo ince bele por setëmber y otober él domandes. Mo an messará ciaré co che le svilup dla pandemia jará. Ince dai marciá internazionai unse bele interessamënt: dal Belje, dala Germania y dai Paisc Basc y Gran Bretagna. Chëstes domandes ne vëgn nia ciamó convertides te prenotaziuns.«

Liéde do deplü de interessant endoman tla ediziun stamapada de La Usc!  (Iaco Rigo)