La Usc di Ladins

Al é domënia de Palsacrusc/ Assënza (ai 24 de ma 2020). Incö consint le tëmp da sté defora a dí la gran mëssa, n grup de stromënc a fle dla Musiga d’La Pli sona por ti surandé plü solenité ala zelebraziun. Atocades é les parores dl ploan Siur Klaus en chësc de che al vëgn recordé l’ascensiun de Gejú tl Cil. Al é sciöche jí a ciasa, chësc iade de Gejú te paraisc – insciö Siur Klaus, y al recorda che le Cil é davert a düc, y al é l’ultim travert de düc, ince de chi che ne ciafa degun alberch y degöna »patria« sön chësc monn por gaujes desvalies. Tröc sciampa na vita intiera da n post al ater, ne pó nia ciafé inzai na ciasa da sté saurí. Siur Klaus á ince rengrazié Chël Bel Di dla poscibilité da podëi indó dí mëssa cun la comunité y por le bel tëmp y la bela natöra che i ún incër nos ia. 
Te Dlijia, a püc metri dal paiun dla Musiga, él ince gnü arjigné ca les proches y les condiziuns por dí mëssa publicamënter, cun i fedei che pó se senté y inslené jö te vigni secunda proca, a na destanza dada dant sce ai n’é nia convivënc y le mascherot indos. Al é da se ausé ales condiziuns, ince sce al é da speré che almanco le mascherot podess gní tut jö pro les mësses, dantadöt alaleria ál püch sëns sce an pënsa che la jënt mëss ma l’avëi sce ara s’avijina a na porsona sot i 2 metri de destanza. Mo al é ince da capí che ma »vare por vare« rovunse fora de chësc tëmp che é sté stlüt pro por n pez daldöt. 

Proes y manifestaziuns 
La Provinzia de Balsan á zacan n de dé löm vërda ai Cors y ales Musighes por fá proa daite respetan la regola 1/10 – che ó dí che al ne pó nia ester plü co 1 porsona por 10 m2 y tresfora na destanza interpersonala de 2 metri. 
Ince por les manifestaziuns culturales él gnü scrit dant les poscibilités: al pó indó gní fat teater, mostré films y metü da jí conzerc, tres tignin ite le dovëi de mascheroc y destanzes y la regola de 1/10 te lercs internes o delimitades. 

Sport amatorial de scuadra 
Nia extra n’é Südtirol en cunt dles prescriziuns por le sport profescional y amatorial de scuadra: al vel inant les desposiziuns statales y i protocoi de segurté. 

Üties da munt y plazes da campé 
La Provinzia de Balsan á ince dé indicaziuns por sté tles üties de munt y tles üties dla jonëza: la capazité de lec vëgn arbassada a 2/3 y la destanza interpersonala de 2 metri scrita dant. Por les plazes da camping él scrit dant da dejinfeté cabines dla duscia y WCs. 

Les artistes y i artisć 
La Provinzia á ince dé fora n secundo poch de aiüc por les artistes y i artisć, cun la poscibilité de sovenziuns ajuntives al pröm poch tla mosöra cona 2.000,00 euro. 

Mascheroc chirurgics 
Al é gnü tut jö le dovëi por colaboradus de ostaries y bars da porté mascheroc dla sort FFP2, al basta mascheroc chirurgics. Lapró pól gní tut na visiera che stopa bocia y nes. I dui metri de destanza danter i ghesć pro mësa é gnüs smendris a 1,5 m, zënza danter la jënt él scrit dant na destanza de 1 m. 

Autobusc nia de linia 
Ince les corieres por iadi y vacanzes pó indó transié. I autisć y ghesć á da avëi indos n mascherot y danter i ghesć sarál da tigní ite les destanzes de 1 m, tan inant che al n’é nia convivënc. 

Parëis da s’arpizé, palestres y zëntri de bëgnester fisich 
I sorvisc é indó gnüs dauris, tres tl respet dles regoles 1/10 y de mascheroc. Ince les nodadoies y termes á daurí cun les prescriziuns aladó. 

Aspetan le de 3 de jügn 2020 
Sce döta la Talia sará a »risch bas«, gnarál dé löm vërda por se möie te döta la Talia y ince foradecá olache i Statesc le consint. 

Le sëns dla responsabilité 
Le Govern a Roma apelëia inant söla responsabilité di zitadins. La bona esperiënza gnüda fata do i 4 de ma 2020 podess jí inant!  (Iaco Rigo)