La Usc di Ladins

»La jënt damana dantadöt informaziuns por i contrac che ai á, dal telefon cina ala forza eletrica«, nes cunta le volontar Vinzenz Hilber a La Ila. Do la stlüta di sorvisc por le coronavirus él indó capité en mertesc ai 16 de jügn 2020 tla plaza dla Ciasa de cultura. Te chësc danmisdé él sté na desëna de porsones che é gnüdes a tó informaziuns dal auto dl Zënter Sconanza Consumadus. L’organisaziun cun sënta a Balsan che se dá da fá por i dërc di consumadus vëgn damanada y adorada cotan, basta ponsé che dl 2019 á l’organisaziun arjunt la rotüda de danns tla mosöra de 1,5 miliuns de euro. Passa 10.000 é stades les pratiches de porsones registrades pro la zentrala che se bat por i dërc di consumadus. 
Consumadus sunse düc, ma che cumpran patüc y sorvisc n’é nia tres tan trasparënt y leal. Al é aziëndes che vënn sorvisc, y dantadöt contrac por sorvisc, che ascogn doía val’ rampin prigorus che comporta lamentanzes y cosć ajuntifs a ci che le cumpradú y consumadú é sigü da ester jü tl pröm. 
Chës 45.000 – 50.000 porsones pëia do anualmënter informaziuns dai esperc de dërt di consumadus a Balsan y pro i colaboradus che röia ince fora dla sënta prinzipala che é da ciafé tla strada Zwölfmalgreiner al numer zivich 2. Nia dalunc a Balsan, tla strada Brenner, él da ciafé le Zënter di consumadus europeich. Le sorvisc á ince filiales ti maius posć de Südtirol, la cherta y i orars é da ciafé sot a www. consumer.bz.it 
L’organiusaziun é de por de ince söl iade cun l’auto informatif. Chësc röia ince, sëgn naota dui iadi al ann, tla Val Badia y s’archita ti punc fac fora deboriada cun i comuns convenzioná o uniuns soziales (sciöche le KVW). Nia düc i comuns ne tol pert al sorvisc che i pitun, dij Vinzenz Hilber. Por le Zënter Sconanza Consumadus él important da jí ti comuns, se mostré presënc y dé na pröma consulënza ala jënt sön dërc y prozedöres da mené inant por fá avarëi i dërc gnüs ciapá sot.  (Iaco Rigo)