La Usc di Ladins

Te püc dis, en sabeda ai 27 de jügn da sëra, gnarál avié n capitul important tla storia dla cultura y dl’ert di raiuns alpins – y al sará n pü’ sciöche n renascimënt do la gran stlüta y la palsa a gauja dl coronavirus: a Pergine, plü avisa tl Ciastel de Pergine, gnarál daurí la mostra d’ert »Viandanti« dl artist badiot renomé Lois Anvidalfarei. La mostra restará metüda fora cina ai 31 d’otober 2020. Al é la 27ejima ediziun dla »gran mostra anuala de scoltöra« da pert dla fondaziun Castelpergine. 
Lois Anvidalfarei nes á incundé chësta staziun importanta de süa cariera y vita cun n salüt desferënt dai atri, che sona bun tles orëdles di apascioná de cultura y ert: »Podun indó pié ia!« Chisc ultimi trëi mëisc á i museums, les galaries d’ert y les mostres palsé a gauja dles restriziuns por le coronavirus. An á albü mancia la vita culturala, chëra che é spëisa por le spirit. 

Artist Lois Anvidalfarei, »podun indó pié ia«! Chësc sona sciöche na liberaziun y tl medemo tëmp da aodanza... Poste nes lascé ciaré ite te tüa vita privata y artistica di ultimi 3 mëisc? 
Lois Anvidalfarei »Podun indó pié ia – chësc ó dí che an é stá chic... y chësc ti é sozedü a tröc de nos chisc ultimi mëisc. Al é sté na bela spana de tëmp por me. Iö á podü lauré sciöche iö á dagnora lauré: conzentré y me tolan le tëmp che iö adori por fá n laur, mo tan de mëisc él bel di che iö ne jô nia fora de fujina. 
Ai pröms de merz unse ciamó condüt i laurs a Pergine y ún metü man de mëte sö la mostra tl ciastel. Al é sté n gran laur: n camion plëgn de 28 scoltöres, vignöna fata ia cun so basamënt y süa armadöra. Te ciastel él ma na picera porta da jí ite y insciö unse messü passé cun na scoltöra al iade. Spo s’á döt archité... la daurida foss stada de aurí, na fiera d’ert importanta por me a Víena y öna a Salzburg é gnüdes desdites, da jí a Praga cun na scöltöra ne jôra nia plö. I sun sté dër fortuné, vigni de podëi lauré y podëi me dé jö cun ci che me interessëia le plö. Mo sëgn él indó bel da podëi pié ia!«

Liéde do deplü tla ediziun stampada atuala de La Usc di Ladins!