La Usc di Ladins

Do les lítes de Comun ai 20 y 21 de setëmber, vëgnel sëgn le tëmp dles prömes sentades costituëntes, cun les prömes propostes de Junta.

Comun de Badia
Le Consëi Comunal nü de Badia é le pröm che s’abina, plü avisa en mertesc ai 6 d’otober dales 9:00 da doman, tla Ciasa Runcher a Badia. Al ordin dl de sarál la confermaziun dl ombolt, la confermaziun di mëmbri dl Consëi y ince le joramënt da pert dl pröm zitadin. Iaco Frenademetz, confermé cun 866 usc - le 43,4%, presentará spo ince süa proposta de Junta, olache l’ombolt ará le compit da ciafé na maioranza te na costelaziun particolara. Süa lista "Badia - La Ila - San Ciascian" á arjunt le 24,9% dles usc cun ma 4 mandac tl Consëi nü, tratan che la lista de so concorënt diret "Manfred Canins Ombolt" é rovada sön le 37,2% dles usc y 7 mandac te Consëi. An pó porchël s’aspeté che chësta lista se damanes gran pëis ince te Junta. Pëis se damanará ince la lista "Deburiada", che á arjunt le resultat dl 28,5% dles usc de lista, cun 5 mandac te Consëi.

Comun de Corvara
Plü scëmpla sará la soluziun tl Comun de Corvara, olache al ê ma na lista sora SVP cun avisa tan de candidac co scagns te Consëi. Le Consëi nü röia adöm le mercui ai 7 d’otober dales 8 da doman. Ince chiló gnarál impröma confermé dötes les inciaries y dé jö le joramënt da pert dl Ombolt Robert Rottonara, che presentará spo süa proposta por la Junta che dess lauré i 5 agn che vëgn.  (pablo)