La Usc di Ladins

Dër debatüda ê stada la sentada dl Consëi dl Comun de Badia, stada ai 10 de dezëmber dl 2020. En particolar êl nasciü de gran discusciuns sön argomënc sciöche la nodadoia publica, le tru dales rodes y la poscibilité da trasmëte les sentades dl Consëi online. Tratan l'ultima sentada dl 2020 á le Consëi de Comun de Badia metü sö deplü grups de laur, che messará se dé jö cun chëstes tematiches.
Por ci che reverda la nodadoia, sarál da fá na analisa di cosć y n plann de finaziamënt, sciöche ince da chirí n post adaté y valuté la conformaziun urbanistica. Le tru dales rodes dess avëi sciöche fin chël de smendrí tres plü y plü le trafich de auti y motors y porchël messará le grup de laur ciafé na buna soluziun. La orenté de trasmëte les sentades dl Consëi dl Comun de Badia, portada dant dala Lista Manfred Canins Ombolt, gnará ince laurada fora da n grup, che messará valuté les posciblités normatives y tecniches por tó sö y registré les sentades y les mëte a desposiziun di zitadins.
I trëi grups de laur é metüs adöm da aconsiadus de dötes les listes rapresentades tl Consëi.

Plü avisa de ci che al é gnü dit tratan les ultimes sentades di Consëis di comuns de Badia y de Corvara podëise lí t' La Usc che gnará fora en vëndres ai 15 de jená.  (kp)