La Usc di Ladins

I ne savess ma gnanca da dí tan de iadi che le maester Albert Daverda é gnü a me ciafé te redaziun d’La Usc. Pro d’ël âl dagnora zetoles cun zifres y statistiches sön le tëmp, na ligrëza che i partësci ince iö. Al â dagnora na coriosité da me dí, val’ particolarité da recordé, val’ de nü da cunté. Al é dal 1976 incá che le maester Daverda scrii sö le tëmp a Lungiarü, n sorvisc che al á fat sëgn 45 agn alalungia por l’ofize idrografich dla Provinzia. Al á – sce an ó dí insciö – scrit para la storia dl tëmp de so paisc. Rodunt incö ai 13 de jená complëscel ince sü 85 agn. Dantadöt ti fajunse porchël nostes mius aodanzes, liades a n gran "Iolan" por la buna colaboraziun y le bel raport uman che i un tres podü avëi. Y chësta é ince na buna ocajiun por ti fá n valgönes domandes sön le sorvisc da verda-tëmp che al á fat por tan dî y che s’á damané gran impëgn y costanza.

T’La Usc di Ladins di 15 de jená nes cunta le maester Daverda co che al á metü man, sce al ti vëgn ert sura da lascé y le ciodí che al ti desplej che la staziun dl tëmp a Lungiarü vëgn tuta demez.  (pablo)