La Usc di Ladins

L’uniun di ostis vedli "HGV 65 plus" á metü a jí en chësc de la pröma spazirada da d’invern. La pröma tapa dl de á condüt i partezipanc a Oies, pro la ciasa nadé de Sant Ojöp Freinademetz, olache al é ince sté la santa mëssa zelebrada da siur degan Iaco Willeit. La jita é jüda inant a San Ciascian, tl museum ladin "Ursus ladinicus", olache le grup de incër 50 ostires y ostis vedli á ince ciafé n pü’ de aperitif, ofrí dala Cooperativa Turistica Alta Badia. Cun le lift de Piz Sorega ésera spo jüda sö alalt, da olache i partezipanc s’á fat na spazirada cina ala Ütia de Bioch, tuc sö dal ostí Markus Valentini. Iló á düc ciafé la marëna y á podü ti ciaré ala cianoa dai vins. Insciö é jüda a piz na jita plajora y sce ara vá do la orenté dl grup de laur, dessel nen garaté ciamó d’atres lapró. Surastant dl grup "65 plus" é Karl Pfitscher y ala pert él ince l’ostí Paul Pizzinini, che á organisé la jita da d’invern.