La Usc di Ladins

Incö él la festa cristiana plü importanta dl ann. "Bona Pasca" é les aodanzes che i nes fajarun cotan de iadi. Ti comuns dl’Alta Badia les ciafon ince do strada, olache ares abelësc le rondel da La Ila, sciöche ince i paisc instësc. Al é n bel sëgn, chël da adoré nosc lingaz dla uma, ci che mostra ince ai ghesć che i sun te n raiun ladin. 
Chi che ó imparé deplü sön les tradiziuns da Pasca, á na poscibilité a Corvara y Calfosch. Cina ai 7 d’aurí pón se fá na spazirada fora por paisc, olache al é gnü metü fora sciablones de üs da Pasca. Lassura pón descurí les tradiziuns da Pasca. An pó pié ia dal ofize turistich de Corvara o Calfosch, olache an ciafa na picia cherta cun le percurs.
Bona Pasca a düc canc, dalunc y daimpró!  (pablo)