Mareo: pedruns cina jö te tru
Chësta domënia él gnü de gran pedruns da Sas de Crosta jö. Dui de gragn é arsis pormez al tru dla roda. Ordinanza dl ombolt
Chësta domënia ai 28 de aurí aldîn n pü’ döt le de che al gnô jö peres tla Val de Mareo, plü avisa dala pert marora de Sas de Crosta - Pares por chi da La Val. Che al vëgn jö peres n’é nia de nü, cis nia tla sajun dl desdlacé. Domisdé s’á le rausciamënt fat ciamó plü sterch. Jënt rovada söl post s’á fat bindebó demorvëia da odëi che dui de gran pedruns ê rová cina jö Fodara Masarônn, plü avisa delá dala pera che an dij, olache al é la poscibilité da grilié, y dantadöt ince olache al passa le tru dla roda. Dui pedruns tan gragn co mez n auto. Do che al é gnü informé l’ombolt de Mareo, él atira gnü contaté i stödafüch, che é jüs a saré jö le tru, plü avisa tl toch dan y do la pera. Ciamó domisdé á l’Ombolt dé fora la ordinanza y an odará spo chisc dis co jí inant. I ziclisć pó intant passé do strada ite. (pablo)
Galaria retrac
View the embedded image gallery online at:
https://www.lausc.it/valedes-ladines/val-badia/27021-mareo-pedruns-cina-joe-te-tru#sigProId9a7abe7bc8
https://www.lausc.it/valedes-ladines/val-badia/27021-mareo-pedruns-cina-joe-te-tru#sigProId9a7abe7bc8