La Usc di Ladins

La sala piena de jent en domenia ai 21 de oril te la Majon di Fascegn per recordèr Pare Frumenzio Ghetta tel diejem cedean da sia departida l é stat la conferma de cotant che l frate de Martin à semenà te sia comunanza. L’emportanza de sia ritajon é stata sotrissèda te duc i intervenc, ma soraldut a più oujes, tant dai esponenc de l’Istitut Cultural Ladin che da chi de l’Union di Ladins de Fascia, che adum i à endrezà la scontrèda, l é vegnù fora adaut l besegn de no se fermèr a la recordanza, ma de portèr inant sia ritajon.

Da la diretora de la Majon di Fascegn Sabrina Rasom, che l’à vidà l domesdì e l’à uzà fora l’emportanza de ge passèr ai joegn sia ritajon, a la presidenta Lara Battisti che à recordà sie contribut a ge dèr n sens de partegnuda a la comunanza ladina de Fascia, al president de l’Union di Ladins de Fascia Fernando Brunel: »didane duc a portar inant soa ritajon!« l à dit te sie prum salut.
L conseier de l’Union e ex diretor del Istitut Fabio Chiocchetti se à palesà amò più concretamenter te sie intervent: l à envià duta  la jent che à scric, documenc, ence letres personèles de P. Frumenzio a les portèr a Sèn Jan, a na vida che les posse vegnir toutes su col scanner e dapò dates de retorn, per regoer duc si scric e l’à dat ence la desponibilità a se meter a la leta per lurèr do a chest projet.
Chiocchetti, ensema con n auter conseier de l’Union, l storich Cesare Bernard, duc doi omegn de cultura che à abù l met de lurèr trop con P. Frumenzio, i à portà dant con competenza ma ence con emozion si intervenc sul lurier del frate: l prum vardan soraldut al aspet leterèr e poetich, l secondo a chel storich.
Momenc de valuta culturala che se à enterzà con etres più lijieres, ma riches de sentiment.

De più su La Usc stampèda de en vender ai 16 de oril.



 (Lucia Gross)