Tla leteratöra ladina unse aldedaincö oramai na dërta cumpëda de libri por mituns. Al é n privilegh y n gran sostëgn al lingaz, sce ince i mëndri pó lí stories, cunties o liëndes te so lingaz dla uma; o sce i geniturs pó ti les lí dant. Na gran locia él indere dötaurela tla leteratöra ladina por jonins: mitans y mituns dla scora mesana o tla pröma adolescënza. Sëgn é la locia gnüda n pice pü’ mëndra; en sabeda ai 4 de ma dales 16:00 gnarál presenté tla Gran Ciasa a La Pli le liber »La lëtra por le re«, na storia de fantasia nasciüda dala pëna dla scrituria olandeja Tonke Dragt y portada tl ladin da Maria Margareth Pedevilla da La Pli. Le roman tla verjiun originala é gnü fora l’ann 1962; bele l’ann do él gnü premié tl’Olanda sciöche »le miú liber por jogn dl ann«; dl 2004 á l’auturia cinamai ciafé n pest spezial por avëi scrit »le miú liber por jogn di ultims 50 agn«. Le liber é gnü venü passa n miliun de iadi y é intratan ince deventé n film y na seria sön Netflix. Al é gnü traslaté te passa 30 lingac; sëgn le ciafunse ince por ladin dla Val Badia, dé fora tres l’Istitut Ladin Micurá de Rü. Na letöra apascionanta y che á ince apascioné Maria Margareth Pedevilla. I s’un incunté para por la damané co che le proiet é gnü a s’al dé, ciünes che é stades les ligrëzes y les dificoltés. Lapró nes ára ince cunté cal che foss so some por incoroné le proiet.
La intervista ciafëise t’La Usc di Ladins di 26 d’aurí
(Intervista: Pablo Palfrader)
"La lëtra por le re" é sëgn ince por ladin
Le famojo roman jonil dl’auturia olandeja Tonke Dragt é bele gnü porté te plü co 30 lingac. Sëgn él ince por ladin dla Val Badia, traslaté da Maria Margareth Pedevilla y dé fora dal Istitut Ladin Micurá de Rü. Na publicaziun che dëida curí la locia de libri ladins por la jonëza
Galaria retrac
View the embedded image gallery online at:
https://www.lausc.it/valedes-ladines/val-badia/26976-la-letra-por-le-re-e-segn-ince-por-ladin#sigProId6a7d09b1e5
https://www.lausc.it/valedes-ladines/val-badia/26976-la-letra-por-le-re-e-segn-ince-por-ladin#sigProId6a7d09b1e5