La Usc di Ladins

Val’ ann él ca, da canche l’ostí, musizist y produzënt autodidat tl tëmp lëde Leo Irsara á dé fora l’ultima CD intitolada »La Rösa de Ioja«. Al ê setëmber dl 2021. Da ailó spo le chît… Bëgn? Al pó ester che chësta sides stada l’impresciun, mo sot ala suraspersa ne lascia val’ mai da busié.

Le musizist da San Ciascian Leo Irsara s’á lascé tomé ite n conzet nü, n’idea nöia, che ti á ince plajü a le grup formé incër ël ia, cun chël che ti ultims agn ál metü pe sön paladina por la promoziun de »Rösa de Ioja« en ocajiun de val’evënt.
»RosinaRosada« á inom le grup nü de Leo Irsara cun Jones Adang, Matteo Irsara y Giordan Crazzolara. Deboriada á i musizisć dla Val Badia lauré fora le conzet, ciafé les dërtes melodies che passeness pro les parores di tesć de Leo Irsara. Les cianties condüj te n iade tl tëmp a conësce realtés forestes, personaji misteriusc, che vir na vita segnada da socrëc, dal contat cun na spiritua­lité via y da n laur sfadius por le suravire te na picera comunité danter les munts, te n tëmp dër dainciará da nos.

LA USC De ci nen vára pa te chësc album nü intitolé »Adömadai«?
Leo Irsara »Adömadai« cunta de n’incuntada danter porsones che vëgn da epoches desferëntes. Tres finestres temporales pó chëstes porsones incunté sü antenac o chi che viô dandaia te chi raiuns. Insciö röia i viandanc tl dialogh cun d’atri personaji de n tëmp passé y vëgn pro da descurí realtés, credënzes y situa­ziuns desferëntes. Propi porchël é l’incuntada, le sté adöm »a vëi« la parora tle por les cianties de chësc album.

Lí inant tla ediziun nöia de vëndres 26 d'aurí !