La Usc di Ladins

Figöres de lëgn por Nadé
Curs cun Pia Pedevilla, tl atelier a Bornech
La designera che abitëia a Bornech tin te so atelier a Bornech (Gross Gerau Promenade 6c) dui cursc de figöres de lëgn por Nadé, por mituns da 7 agn insö (acompagná) y por adulc interessá. Al gnará fat angeli, renes, trëi resc, San Micurá, stëres ez., taiá fora te lëgn massif, spo depënc y decorá.
I cursc é en sabeda ai 25.11. o en domënia ai 26.11., dagnora dales 14:00 ales 18:00.
Le prisc é de 60,00 euro a ce plü 20,00 euro por material (i acompagnadus ne paia nia). I cursc vëgn metüs a jí en colaboraziun cun l’EPL–Ert por i Ladins. Al vëgn tut sö 6–8 partezipanc a curs. Infos y iscriziuns pro Pia Pedevilla al 348 2221745, info@piapedevilla.com


Kyrios: »50 agn sot la medema stëra«
Le grup s’la conforta da fá festa ai 17, 18 y 19 de novëmber 2023 a Badia
La storia di Kyrios é scialdi lungia, le cor é teco en pe dal 1973 incá. Chësc ó dí 50 agn de melodies, emoziuns, amizizies, aventöres, crises, sacrifizi y sodesfaziuns. Y na gran festa de iubileum che tlocora oramai pro porta.
La festa mët man incö vëndres ai 17 de novëmber dales 20:00, tla Ciasa dles Uniuns J. B. Runcher, cun la presentaziun de n liber dër inovatif, scrit por chësta ocajiun da mëmbri atifs dl cor, basé sön inputs di pioniers. »50 agn sot la medema stëra« é so titul, y chi che é coriusc da lí de vigni sort de testemonianzes, descurí val’ socrët y ince ascuté na ciantia o l’atra ará la poscibilité da le cumpré. Le program pîta ince na mësa torona che gnará portada dant te na manira n pü’ alternativa, mo nia manco ligherzina y sambëgn melodies y cianties. Na serada plëna de devertimënt!
La domënia ai 19 de novëmber ciantará düc i Kyrios, mëmbri atifs y nia, acompagná da n gröm de stromënc, la gran mëssa a Badia dales 10:00. La festa vá inant y se stlüj jö dales 17:00 cun n conzert de dötes les genera­ziuns, tla Ciasa dles Uniuns J. B. Runcher.
Ma la sabeda ai 18 é la festa dedicada esclusivamënter ai mëmbri atuai y ai ex-mëmbri, olache al ne manciará nia val’ sorpresa.
La gran festa de iubileum abina adöm jogn y manco jogn che á fat pert o fej pert dl’uniun dal 1973 incá y che partësc la pasciun por la musiga. Ara dess ester na bela ocajiun sides por i mëmbri de dötes les 5 generaziuns che pó s’incunté y passé indô de bi momënc en compagnia, sides por n publich che ascuta ion nosta musiga y ó imparé a conësce plü avisa le passé de nos Kyrios. Al ves aspeta n program desvalí y plajor, olache al se fajess gran plajëi da ves odëi tröc.
De plü informaziuns ciafon sön la plata internet dl cor www.kyrios-badia.it .


»Calënder Ladin 2024«
Presentaziun dl Calënder Ladin nü indoman sabeda ai 18 de novëmber 2023 dales 16:00 tl Istitut Ladin Micurá de Rü a San Martin de Tor
L’uniun culturala y artistica EPL–Ert por i Ladins inviëia ala presentaziun dla »pratica ladina« nöia a San Martin de Tor, tla cornisc de n domisdé leterar de au­turies y auturs dla Val Badia che se dá jö te sü tesć lirics y prosaics cun le significat y la inter­pretaziun dles parores »Val Badia, patria mia, ciáfest’ prësc inc’ tö la ria« che fej pert dla ciantia conesciüda di Ciastelans. Cun les cianties ladines dl duo Laura Willeit y Hubert Dorigatti ciafará i tesć y les letöres la dërta saú y sugestiun.
Venüda dl »Calënder Ladin«
Le »Calënder Ladin 2024« vëgn ince en chësc ann indô venü da ciasa a ciasa tla Val Badia y tles botëghes Minimarket da Richard a Longega y Mascotte a Al Plan de Mareo, al prisc de 15,00 Euro.


Teater a Santa Cristina
Nce chëst ann vëniel purtà dant, te Sala de Chemun de S.Cristina, n pez de teater da rì: »Ce sotsëura« (»Alle außer mir«) de Stefan Vögel, sot ala regia de Annemarie Schenk. La traduzion dl pez tl gherdëina ie de Bruno Senoner
Mike uel maridé Fernanda. Dan ti lascé si muta a Fernanda, uel si pere mparé a cunëscer si jënder dl daunì. Y mo miec uelel savëi coche la sta cun si finanzes y chësc mët n deficultà dantaldut Sasha, revisëur di conc y miëur cumpani de Mike. Y sciche sce chësta situazion bele scialdi cumplicheda ne bastëssa nia, ie te n colp si nevicia da dant, Isabel, dan porta – cun na popa tl brac. Mike ne possa nia avëi duta chësta cumplicazions y perchël muessa Sasha fé sciche sce l fossa l pere. Ma de chi ie pa la pitla per n davëira? N gran sotsëura. La sëula a avëi dut sot a cuntrol ie Zita, la fancela, che se fej paië bel sëch si scuté. L pere dla nevicia, che duc rata che sibe na persona tan da stimé, ajache n uem y pere moralmënter de model per i autri, à per n davëira ënghe si gran sucrëc. N labirint de fauziteies ulache l semea de no plu ruvé ora…
La première dl pez ie n mierculdi ai 22 de nuvëmber dala 20:30 tla Sala de Chemun a Santa Cristina. Daldò saràl mo cin’ rapre­jentazions: n dumënia ai 26.11. dala 17:00, n merdi ai 28.11. dala 20:30, n juebia ai 30.11. dala 20:30, n sada ai 02.12. dala 20:30 y n lunesc ai 04.12. dala 20:30 – for te Sala de Chemun a Santa Cristina.
I:la atëures che sarà da udëi sun paladina ie Martin Runggaldier (Mike), Ivan Runggaldier (Sasha), Steffi Eschgfäller (Isabel), Verena Insam (Fernanda), Evelyne Kerschbaumer (Zita), Helmuth Karbon (Alexander Dalmuet), Nadia Insam (Claudia). Silvia Senoner dij ite.
Chertes danora pòssen apusté cherdan su Paola Stuffer al 339 3399266.
Sun Vosc unì se ncunforta la grupa de Teater de Santa Cristina.


Referat: la cura paliativa
La Ciasa de Palsa Ojöp Frëinademetz A.P.S.P. inviëia al referat por düc sön la cura paliativa, en vëndres ai 24 de novëmber dales 19:30, cun la referënta Evelin Tollenaere
»Palliative Care«, ince cone­sciüda sciöche assistënza paliativa, é na forma de assi­stënza por paziënc cun mara­ties prigoroses y ries, olache ara ne vá nia plü da varí. Le fin prinzipal dla medejina y cura paliativa é de mioré la cualité de vita y le bëgnester dl paziënt, alisiran i mai y d’atri sintoms che pësa. Ara pîta sostëgn psicosozial y tin cunt di bojëgns dl paziënt y de süa familia.
La referënta Evelin Tolle­naere pó mostré sö tröc agn de esperiënza tl repart paliatif de Martinsbrunn a Maran y sorvisc ambulanc tla assistënza paliativa, sciöche infermiera diplomada cun stüde master tl »Palliative Care«. Da dailó inant cina incö ésera ativa tla formaziun dl personal sanitar. Ara é mëmbra y referënta sosti­tuta dla seziun cura dl’asso­­ziaziun todëscia por medejina paliativa. Ara dij: »Mia vijiun personala é daidé pro che dötes les porsones che nes vëgn afidades pois gní tratades y curades cun dignité, te n sistem sanitar olache l’assistënza é tl zënter.«


Corvara: Segra de Santa Tarina
I Stüdafüch da Corvara organisëia en sabeda ai 25 de novëmber la Segra da Corvara, cun mëssa, batadú y tröpa aurela cörta
La festa mët man dales 9:00 cun la santa mëssa ciantada te dlijia, por jí spo inant cun musiga y aurela cörta tl salf dles manife­staziuns. Dales 10:00 ales 14:00 él na matinée cun i »Volxbrass« y dales 14:00 mët man le gran batadú (iscriziuns al 335 8335841). Dales 20:30 cina ala 1 de nöt él musiga da bal cun i »Tiroler Wind«. Por i jogn él ince n tendun scialdé cun musiga de DJ Tino. Da sëra vëgnel organisé n taxi debann, che an pó cherdé sö al 348 2620029.


Liber nuef dl Museum Gherdëina
L Museum Gherdëina nvieia de cuer ala prejentazion dl liber nuef dal titul »Frühes Gröden«–Storia dl nridlamënt y di plu vedli inuemes de Gherdëina, ai 23 de nuvëmber dala 18 tla gran sala dla Cësa di Cungresc a Urtijëi
L liber dat ora dal Museum Gherdëina ie l resultat de trëi ani de tuedes sotes, pra chëles che i doi studiëusc Josef Nössing y Cristian Kollmann à ejaminà a puntin la storia dl nridlamënt tla valeda y l senificat di plu vedli inuemes de mejes y dl raion de Gherdëina.
La nrescides metudes adum te na publicazion de n 200 plates cun chertes ilustratives, grafi­ches y fotografies cuer nsci na locia tla cunescënza dla ravises de Gherdëina y porta ite na vijion nueva dla storia, che fina via defin cun la minonga che Gherdëina ne ebe abù deguna mpurtanza tla storia dl nridla­mënt nchin al prim milené do Crist. Sëuraprò ie l liber arichì da na documentazion de foto­grafies dla cuntreda.
La prejentazion dl liber unirà fata deberieda cun i doi autëures Nössing y Kollmann per tudësch. Curnisc mujighela sarà dla grupa Cellonoton de Gherdëina. L liber ie n chësta sëira da pudëi cumpré a n miëur priesc y sarà daldò da giapé sibe tl Museum che tla libreries.


Prejentazion dl liber »Kann Südtirol Staat«
N juebia ai 23 de nuvëmber dala 8 da sëira tl Tublà da Nives te Sëlva
N Stat tlamà Südtirol – mé na ilujion o n scenar da pudëi se nmaginé? Passa cënt ani do l’anescion ala Talia vëniel te n liber nuef dal titul »Kann Südtirol Staat« fat per l prim iede lum n cont dl’idea cuncreta de n stat de Südtirol ndependënt.
N team de scienziac, prufessëures, blogger, autëures se à dat ju a fonz cun chësc argumënt da ponc de ududa desfrënc. I ie unii sustenì da esperc de Südtirol y da dut l mond. L liber mostra tres resultac de scuviertes ciun vares che n muessa fé per mëter mpe n stat. Tl liber, che unirà prejentà n juebia ai 23 de nuvëmber tl Tublà da Nives, vëniel stlarì ucajions, resiedes, cundizions y strategies desfrëntes.
L Tublà da Nives nvieia de cuer a unì a ti scuté su ai autëures Marco Manfrini y Simon Constantini Muderazion de Wolfgang Mayr.


Mostra speziela: Balsamo Stella
Guido Balsamo Stella: L urientamënt nuef dl’ert te Gherdëina 1924-1927
Che Gherdëina possa auzé ora artisć y artistes a livel nternaziunel dla prima metà dl XX ejim secul ie nce de gra al artist Guido Balsamo Stella. Dal 1924 al 1927 ie ël stat diretëur dla doi Sco­les d’ert de Urtijëi y Sëlva, purtan nsci pro a dé n urien­­­tamënt defin nuef tl’ert dl ziplé de Gherdëina.
Te chësta mostra uni­ràl cunfruntà l’opres dl Mae­stro Balsamo Stella cun chëles de si nsenianc y sculeies dla Scoles d’Ert.
L merit de Balsamo Stella coche renuvadëur dl’ert te Gherdëina vën auzà ora cun na mostra speziela dl Mu­seum Gher­dëina ntan l mëns de nuvëmber. La giaurida ie n juebia ai 9 de nuvëmber dala 18:00 tla Lia Mostra d’Ert sun plaza S. Antone a Urtijëi y resterà da udëi nchin ai 1 de dezëm­ber, dal lunesc al vënderdi, 14:00–18:00. De sada iel daviert danmesdì, 10:00–12:00, cun vijita meneda dla curadëssa Danila Serafini.
Info: www.museumgher deina.it, tel. 0471 707554


Cursc da nodé por mitans y mituns
La US La Ila pîta cursc por mitans y mituns dla scolina y dla elementara. Ai mët man ai 8 de dezëmber
Le vëndres ai 8 de dezëmber pëia ia i cursc da nodé por mitans y mituns dla scolina y dla elementara, tla nodadoia da La Ila, tignis da Davide Moling y Heinrich Conrater.
Scolina – prinzipianc: dai 08.12. inant vigni vëndres por indöt 8 iadi (adinfora dl tëmp da Nadé), dales 14:00 ales 14:45, resservé ai agn 2018 y 2019. Curs plü entrada tla nodadoia: 95,00€.
Scolina – progredis: dai 08.12. inant vigni vëndres por indöt 8 iadi (adinfora dl tëmp da Nadé), dales 14:45 ales 15:30, resservé ai agn 2018 y 2019. Curs plü entrada tla nodadoia: 95,00€.
Elementara – düc i liví: dai 08.12. inant vigni vën­­dres (adinfora dl tëmp da Nadé), dales 15:30 ales 16:15. Curs plü entrada tla nodadoia: 95,00€.