La Usc di Ladins

Cursc da nodé por mitans y mituns
La US La Ila pîta cursc por mitans y mituns dla scolina y dla elementara. Ai mët man ai 8 de dezëmber
Le vëndres ai 8 de dezëmber pëia ia i cursc da nodé por mitans y mituns dla scolina y dla elementara, tla nodadoia da La Ila, tignis da Davide Moling y Heinrich Conrater.
Scolina – prinzipianc: dai 08.12. inant vigni vëndres por indöt 8 iadi (adinfora dl tëmp da Nadé), dales 14:00 ales 14:45, resservé ai agn 2018 y 2019. Curs plü entrada tla nodadoia: 95,00€.
Scolina – progredis: dai 08.12. inant vigni vëndres por indöt 8 iadi (adinfora dl tëmp da Nadé), dales 14:45 ales 15:30, resservé ai agn 2018 y 2019. Curs plü entrada tla nodadoia: 95,00€.
Elementara – düc i liví: dai 08.12. inant vigni vën­­dres (adinfora dl tëmp da Nadé), dales 15:30 ales 16:15. Curs plü entrada tla nodadoia: 95,00€.
Iscriziuns anter i 6 de dezëmber sön www.uslaila.it – infos y suport por iscriziuns: fitness@uslaila.it

Curs de paslunch por scolari dla scora elementara y mesana
A San Ciascian tl zënter de paslunch Saré. Les tecniches insegnades é la tecnica classica, le skating y le biathlon
Le curs metü a jì dala Scora de schi da palunch Alta Badia gnará tigní por 10 iadi, vigni vëndres dales 14:00 ales 16:00, le pröm de de curs cun la formaziun di grups sará en sabeda, ai 16 de dezëmber 2023, dales 14:00. Le curs costa 160,00 € y tól ite 10 unités (indöt 20 ores). L’imprëst di schi costa 10,00 € al iade o 80,00 € indöt por 10 iadi. Le curs vëgn metü a jí cun la partezipaziun de almanco 5 partezipanc. I interessá pó se lascé mëte söla lista cherdan sö le nr. tel. 339 8068111 o tres e-mail a info@scuolafondo.it

»Tëmp da Nadé te museum«
Le Museum Ladin Ciastel de Tor deura ince d’invern sües portes por les manifestaziuns »Tëmp da Nadé te museum«
Le Museum Ladin Ciastel de Tor pó gní vijité cun entrada debann. Al vëgn pité da bëre y da mangé. Chiló deplü söles manifestaziuns:
la sabeda, 2 de dezëmber, dales 17:00 ales 19:00, sona scolares y scolari dla scora de musiga Val Badia melodies renascimentales y baroches ti salamënc dl Museum Ladin Ciastel de Tor. Por mituns y mitans vëgnel proponü en laboratore creatif.
La sabeda, 9 de dezëmber, dales 17:00 ales 19:00, pita le trio de archëc »Camava« na cornisc mu­sicala tla stüa dl Museum Ladin Ciastel de Tor.

L’ega da bever per Urtijëi
L Istitut Ladin Micurà de Rü à l plajëi de nvië ala prejentazion dl liber »L’ega da bever per Urtijëi« de Ludwig Moroder, n vënderdi ai 1. de dezëmber dala 18:00 tla sala dl Cunsëi de Chemun de Urtijëi
Un di fins de chësc liber ie chël de judé a udëi ite l gran valor de pudëi menadrë giaurì la spina te nosta cëses per avëi te got na bona ega da bever: n resultat che ne vën nia da sëul. N possa mé l arjonjer cun nvestimënc de scioldi y de lëur, per mantenì dut l egaduz aldò, ma nce mudernisan y miuran si strutures. Chësta publicazion uel dé si cuntribut fajan cunëscer la carateristiches dl’ega da bever per Urtijëi, ma nce de nfurmé sun i majeri lëures che l ie unì fat, bele dal 1900 inant, cun l cuntribut de privac, ma dantaldut da pert dl’aministrazion publica. Mantenì la carateristiches che l’ega à da mustré su pra la funtana nchin pra spina ie n mpëni primer. Avëi crëta te n’ega segura y bona ie l prim var per lascé te butëiga la bozes y per se ncunferté sun la bona ega frëscia te cësa.

Urtijëi 2023: co sons’a metui?
L Chemun de Urtijëi nvieia a na sëira de nfurmazion n con’ dl lëur fat nchin śën da pert dla grupa de lëur n cont dl Prugram de svilup cumenel. L apuntamënt ie n mierculdi ai 29 de nuvëmber dala 20:00 tla gran sala te Cësa di Cungresc
Ntan la sëira jiran ite sun la situazion da śën ti ciamps dl’urbanistica, dl ambient, dl turism y dla mubiltà. L pruf. Thomas Bausch (diretëur dl zënter de cumpetënza mubiltà y turism dl’Università de Bulsan) prejenterà l resultat dla nrescida che l Chemun ova mandà ora ala populazion ntan l instà.
I tecnicher Peter Morello, Marco Molon, Francesco Sbetti, Helmuth Moroder y Alois Kronpichler fajerà na prejentazion curta de chël che ie unit laurà ora nchin śën. Do la prejentazions puderà l publich se purté ite cun reflescions y tëutes de posizion. Duc i zitadins y duta la zitadines ie de cuer nviei:des a unì a chësta sëira de nfurmazion.

Gran Batadù di Destudafuech de Sëlva
I Destudafuech de Sëlva nvieia al Gran Batadù da 128, n dumënia ai 26 de nuvëmber tla sala di Destudafuech te Sëlva
Coche da tradizion mët i Destudafuech de Sëlva inò a ji n Gran Batadù,n dumënia ai 26 de nuvëmber. Dala 10:00 inant puderàn »Frühschoppen« y daldò puderàn s’la lascé jì bona y sté n cumpanìa pra na bona marënda cun Törggelen. L turnoi de Batadù mët man dala 14:00 y per mutons y mutans dai 5 ai 12 ani saràl n turnoi de »Mau Mau«. L sarà nce mujiga dal vif y devertimënt cun la grupa »Conturines Echo«, che sunerà dala 16:00 inant y n puderà sambën vëncer de biei pesć, danter chisc n Skipass per Gherdëina, n »Day Spa« y n bon per cumpré ite te na butëiga dal sport. Iscrizions vën tëutes su n chël di, ai 26.11. dala 10:00 inant tla sala di Destudafuech.
Duc ie de cuer nviei.

Cunzert »Weihnachts – Schlagertherapie«
I Jëuni de Mujiga Gherdëina nvieia al cunzert »Weihnachts–Schlagertherapie« n merdi ai 28 de nuvëmber dala 20:00 tla Cësa di Cungresc a Urtijëi
Vàla pa nscì nce a Vo? N gëura la zaita, mpëia la televijion o l radio y vën riesc piei dala despe­razion: vieres, teror y catastrofes natureles... y sce l ne bastëssa nia vëniel sëuraprò uni ann nce l Nadel. N vën nviei y sburdlei a cumpré, cunsumé, spënder. Lumes, fuera y decurazions dloncora–nsciuma, l ie dut l cuntrer che chël che n se aspitëssa dal tëmp chiet y de reflescion da Nadel.
Ne giapëis’a nia nce Vo ueia de mucé da duta chësta mascineria da Nadel? Mucé dalonc, tl mond di plu gran suzesc dla mujiga tudëscia di ani 50 y 60 de Caterina, Vico, Connie y Peter, Udo y sambën Peter »l grant«.
Sce la ie nscila ie chësc cunzert propi l drët per Vo: per desmincë per n mumënt duc i cruzi y festidesc y se lascé purté te n mond dut »kitsch« – y sce bele »kitsch«, pona bën sciche l toca!

Maraties psichiches pro jënt de

• 
•  

View the embedded image gallery online at:
https://www.lausc.it/manifestazions-y-evenc/25675-manifestazions-atuales-speziales#sigProId5958d58c09

tëmp
La Ciasa de Palsa a San Martin inviëia al referat dal titul »Maraties psichiches pro jënt de tëmp. Co pói pa me comporté cun chëstes porsones?« en jöbia, ai 30 de novëmber dales 19:30 cun le referënt Markus Fischnaller d’La Pli de Mareo. Le referat é por todësch
La demënza y la depresciun é les maraties psichiches che vëgn dant le plü gonot pro la jënt de tëmp. La probabilité che la tëma y la depresciun vëgnes a s’l dé tl medem momënt é ciamó lapró dër alta. Cun l’eté pól deventé rî da desferenzié danter sëgns de invedlamënt, maraties fisiches y maraties psichiches che á debo­jëgn da gní curades – deache gonot ti vëgnel ciaré deplü ai sintoms fisics. Al röia lapró le fat che dantadöt les porsones de vedla generaziun se stënta da nen baié, da les descrí y da les identifiché sciöche maratia. Al dá insciö le prigo che paziënc d’eté tól massa tert la dezijiun da se lascé curé y che maraties psi­chi­ches o fisiches, sciöche por ejëmpl diabetes, maraties ala zircolaziun o dolurs cronics, é bele danman. Mo co dess pa mëmbri de familia, compagns o personal dla cura se comporté cun chëstes porsones? Ci adora pa chëstes porsones? Markus Fischnaller á na gran esperiënza te chësc ciamp tan delicat.

Pastelné por Nadé
Cursc cun Pia Pedevilla, tl atelier a Bornech
La designera tin te so atelier a Bor­nech (Gross Gerau Promenade 6c) dui cursc da pastelné por Nadé, por mituns dai 7 agn insö (acom­pagná) y por adulc interessá. Al gnará fat zbergli, cerfs, angeli, i trëi resc, mandli dla cripele, stëres, yii., taiá fora te lëgn massif, spo depënc y decorá.
I cursc é en sabeda ai 2 de dezëm­ber y en domënia ai 3 de dezëmber, dagnora dales 14:00 ales 18:00. Le prisc por curs é de 60,00 euro a ce plü 20,00 euro por material (i acom­pagnadus ne paia nia), I cursc vëgn metüs a jí en colaboraziun cun l’EPL–Ert por i Ladins. Al vëgn tut sö 6 partezipanc a curs. Infos y iscriziuns pro Pia Pedevilla al 348 2221745, info@piapedevilla.com

Marcé da Nadé
Tl zënter sozial La Spona a Pederoa en sabeda, ai 2 de dezëmber 2023
La pröma nëi é bel tomada, i dis che nes despartësc da Nadé, vëgn tres de manco y l’atmosfera é bel dër plajora. Porchël oress i assistis y les assistëntes dl Zënter sozial La Spona dër bel Ves invié al Marcé da Nadé. En sabeda, ai 2 de dezëmber 2023 Ves aspetunse dales 10:00 ales 17:00 por nes mostré ci che i nes un ponsé fora de bel. I pitun creaziuns y decoraziuns fates a man, idees por scincundes da Nadé, gherlandes d’Advënt, lëgns da Nadé tradizionai y moderns, angeli, scatores de lignan vedl y n gröm d’ater bel patüc. L’Uniun di Ladins Val Badia venará libri, presentará sües publicaziuns nöies y domisdé dales 14:00 inant gnarál pité letöres de stories por pici. I esson dër ligrëza sce gnesse a nes ciafé, i Ves aspetun! (La Spona)

Das weiße Dorf – teater tl Tublà da Nives
L Tublà da Nives nvieia ala reprejentazion dl teater »L luech blanch« - »Das weiße Dorf«, n juebia ai 30 de nuvëmber dala 20:00 tl Tublà da Nives te Sëlva
Tl pez dl’autëura austriaca Teresa Dopler, premià tl 2019 pra l Heidelberger Stücke­marktes, vëniel tematisà l senificat plu sot y la mpurtanza dl »garaté« dla cumpunëntes primeres dla vita dla persona: familia, prufescion, amezizia, amor, tëmp liede… Te na forma umoristica y n pert cianteda, ma che uel nce dé da pensé, tòl »Das weiße Dorf« sot al udlon la dumanda n cont de chi y cie che son y coche la (pu)dëssa ji inant. Cun Laura Masten y Markus Westphal, regia de Alexandra Wilke.
Per resservé la chertes possen scri na mail a info@tubladanives.it o nce tres whatsapp al numerzion 333 716647. La ntreda costa 10 euro, cumëmbri:es dl Tubla da Nives paia 8 euro.