La Usc di Ladins

Pest de poejies ladines »Angelo Trebo«: escrizion dla diejima edizion
Termen per mené ite les poejies: 15 de merz 2024
Al é n concurs de poejies davert a duc chi che scriv per ladin, metú su dl 1997 a San Martin de Tor. Con l’edizion dl 2012 é l pest trienal vegnù daurì a dutes les variantes ladines y i idioms ladins dl raion dles Dolomites, cie che à porté spo tles ultimes cater edizions a na maioura partezipazion da pert de autoures y autours. L’edizion nueva, segn daverta, é chela dl 2024. La premiazion é preveduda per mei 2024.
Criters y condizions
Da prejenté él – ence en chest iade – anter trei y cinch poejies. I prums trei posć é ciariés con pesć monetars de 500,00, 300,00 respetivamenter 200,00 euro. Per tò pert él da paié ite sun l cont bancar IBAN IT41H 08010 58830 000 304000455 intesté a l’EPL-Ert por i Ladins la comiscion de partezipazion de 20,00 euro.
Vigni autour:a prejenteia les poejies te cinch copies, les contrassegneia con n pseu­donim y ajonta laprò te na mendra cuverta scluta si dac anagrafics y l’atestazion dl versament dla comiscion de partezipazion. Sun la mendra cuverta scrivel:ela si pseudonim.
La miscion per mené ite o dé ju a man l material per tò pert al concurs – anter l 15 de merz 2024 – é:
EPL-Ert por i Ladins, Pest »Angelo Trebo«, str. Stufles 20, 39030 San Martin de Tor/San Martino in Badia, BZ.

Aurona Ores: l tesor palesà
N nef projet lea èrt, or e contia. Scrivete ite per tor pèrt a la prejentazion con laboratorie ai 15 de dezember te Museo Ladin
En vender ai 15 de dezember da les 17:00 te Museo Ladin de Fascia vegn portà dant l projet »Aurona Ores«. La prejentazion vegn fata te na scontrèda interativa a numer serà olache la contia se mesceida con laboratories pratics.
Tel cors de la scontrèda se podarà descorir la colezion Sommavida, de preziousc unics de porzelana de Limoges, creida de Fascia e or, creé e realisé a man da la doi artistes fascènes Katiuscia Rasom e Carlotta Nemela.
Co prenotèr l post:
Dal sit Kreides.it te la sezion Blog l é l articol dedicà, con duta la informazions per tor pèrt e l link de prenotazion. Pel tor pèrt no più che 20 persones.

Festa dl liber
L Circolo–Lia Mostra d’Ert nvieia ala Festa dl liber, n lunesc ai 11 de dezëmber dala 20:00 tla sala dla Lia Mostra d’Ert
Roberta Dapunt y Nadia Rungger lijerà ora dl’antologia lirica „habe bewurzelte Stecklinge. Geografie meiner inneren Sprache“.
Tlo pudëssa nascer na planta oma, zeche che pudëssa scumencé a flurì, na plecia vërda, zeche che crësc sun la tiera, si geografia dedite. L’antologia de poejia »habe bewurzelte Stecklinge« uel ti jì permez a chësc crëscer y ti cialé ala rujeneda dedite n nterazion cun la fotografia. L liber se cunzentrea sun la diversità linguistica y sun l multilinguism dla poejia y sun si puscibltà de fé udëi l intim, l cuer te si muvimënt. Ajache ëila, la poejia, nes da speranza che la belëza sibe mo for, la diversità che dà culëures a nosta vita y che nes dà mutivazion da scrì inant.

Les scores altes y la manira da lauré
Sëra d’informaziun sön les Scores Altes da La Ila, ai 12 de dezëmber dales 18:00. Ai 13 de dla porta daverta
Les Scores Altes La Ila inviëia en mertesc, ai 12 de dezëmber dales 18:00, tla sënta dles Scores Altes, a na sëra d’informaziun. Al vëgn presenté les trëi sorts de scores altes che fej pert dl Zënter scolastich da La Ila: Istitut Tecnich Economich, Lizeum Linguistich y Lizeum dles Sciënzes Umanes (SOWI). La direturia dut.ia Elena Pellegrini y la vizedireturia dut.ia Elisabeth Frenner ti dará le bëgngnü a geniturs, scolars y scolares y a düc y dötes che á interes da conësce damí nostes scores cun sües strotöres y da se fá na idea de sciöche al vëgn lauré. Le mercui ai 13 de dezëmber dales 8:00 ales 12:50 é spo düc canc bel inviá al de dla porta daverta.

Schi Club: prejentazion dla scuadres
L Schi Club Gherdëina nvieia a la prejentazion dla scuadres de duta la disciplines sportives dl Schi Club Gherdëina, di:dla trainadëures  y dl cudejel dl ann nuef 2022-23
L apuntamënt ie n duman, vënderdi ai 8 de dezëmber dala 18:00 sun l purtoi Palmer a Urtijëi. Duc i funzioneres, sustenidëures, atlec y atletes, cumëmbri y apasciunei dl Schiclub Gherdëina ie nviei de cuer.

Giaurida dla mostra “bel blanch y fosch”
N sada ai 9 de dezëmber veniel giaurì tla galaria Vijion a Puntives, dala 18:00 na mostra de 9 artisć:tes che prejënta opres a blanch y fosch
Blanch y fosch ie culëures, ma nce nia culëures, si definizion ne n’ie nia drë’ tlera. I ie un per pert, orainsom dla scela cromatica y si funzion ie avisa chëla de duc i culëures, de descedé sentimënc. La simbulogia dl blanch y fosch depënt dal pont de ududa de uni cultura y persona. Mo al didancuei tëntun a lië l blanch ala inuzënza, simbul de purëza y l fosch al mont sot a tiera, sciche de dí l bon y l mel. Ma unfat coche n uel descrì chisc culëures, vëira iel che la sëula destinzion che vel per duc ie che l blanch ie per l di/linëus y l fosch per la nuet/scur. I:la artisć:tes che met ora: Julia Bornefeld, Egon Digon, Valeria Stuflesser, Daniel Mirchev, Markus Delago, Choi Kyung Ae, Gregor Prugger, Flavio Senoner y Rupert Kreuzer
La mostra resta davierta nchin ai 9 de jené 2024, dal lunesc ala sada danter la 16:00 y la 19:00.

Cunzert dl’Urchestra Haydn
I Jëuni de Mujiga nvieia al cunzert dl’Urchestra Haydn, n juebia ai 14 de dezëmber dala 20:00 tla Cësa di Cungresc a Urtijëi
Per la lingia di cunzerc di Jëuni de Mujiga de Gherdëina saràl da audì proscima juebia l cunzert daniëura drët aspità dl’Orchestra Haydn de Trënt y Bulsan, sot ala bachëta de Enrico Calesso.
Sun l prugram saràl n chëst ann la sinfonia n. 1 tl re maggiore, op. 25 tlassica y la sinfonia nr. 1 tl D-Dur, op. 25 sinfonia tlassica de Sergej Prokofiev.
Do chël lascerà l’Orchestra Haydn nce audì l cunzert per l’oboe y urchestra tl re maggiore y cunzert per oboe y urchestra tl D-Dur de Richard Strauss y per finé via la »Apollon musagéte« de Igor Stravinskij.
La chertes de ntreda ie da giapé pra la cassa y danora tl ufize dla Lia per l Turism de Urtijëi.

Sommelier sön pista tl’Alta Badia
Da dezëmber cina ala fin dla sajun pón tó pert a deplü apuntamënc cun degustaziun de vin, sön les pistes dl’Alta Badia
Do le gran suzes dles ultimes sajuns, vëgnel metü a jí ince chësc invern sön les pistes dl’Alta Badia l’iniziativa »Sommelier sön pista«, che valorisëia y fej conësce i mius vins de Südtirol.
Indöt vëgnel metü a jí ot apuntamënc, che é söl program ai 12 de dezëmber 2023, ai 9 y 23 de jená 2024, 20 de forá, 5, 12 y 19 de merz y ai 2 d’aurí. An se incunta dales 13:45 sön Piz La Ila, por pié ia cun i schi adöm a n maester de schi y n sommelier. Le grup de partezipanc storj pro te döes üties, olache al gnará ciarcé i mius vins de Südtirol, che vëgn spligá dal sommelier. Por tó pert a un di apuntamënc mësson se scrí ite ti ofizi turistics dl’Alta Badia o online, al prisc de 40,00€ a porsona. L’iniziativa vëgn metüda a jí da Alta Badia Brand en colaboraziun cun le Consorz di Vins de Südtirol y l’Assoziaziun di Sommelier de Südtirol.

Defilada di Angeli a Corvara
I angeli sará i protagonisć dla manifestaziun metüda a jí fora por le paisc da Corvara, ai 9 de dezëmber
La sabeda ai 9 de dezëmber vëgnel organisé tl paisc da Corvara la cuinta ediziun dla »Defilada di angeli«. La manifestaziun mët man dales 17:00 pro le stade dala dlacia, cun n pice spetacul sön la dlacia da pert dl grup de jadiné »Ice Club Alta Badia«. Do l’esibiziun dles jones y di jogn jadinadus, pëia ia la defilada dal stade dala dlacia, fora por le paisc de Corvara, por rové sön plaza de Comun pro le pice marcé da Nadé. Chësc é davert tles fins dl’edema fora por le mëis de dezëmber y les döes edemes sura Nadé y Nanü. Tl zënter dl paisc gnarál tigní n conzert cun les plü beles melodies d’Advënt y da Nadé adöm a düc i grups musicai che tol pert ala defilada y an podará ince se scialdé cun val’ de cialt, che vëgn dé fora tle piceres üties dl marcé.