La Usc di Ladins

SunRisa en ocajiun dles gares de Copa dl monn
En ocajiun dles gares Copa dl monn de schi tl’Alta Badia, podarán pié ia le lönesc cun i schi bele dales 7:15 y se gode n bun gosté tles üties

Le lönesc ai 18 de dezëmber, en ocajiun dla manifestaziun SunRisa, podarán jí cun i schi bele da doman adora, se gode le lové dl sorëdl y ester danter i pröms sön pista. Te chësta ocajiun podarán ince storje pro tles cin’ üties Piz Arlara, I Tablá, Bioch, Las Vegas y Club Moritzino por n bun gosté cun produc sagns, aconsiá sciöche gosté ideal dala esperta de nudrimënt Elena Casiraghi. I implanc portamunt de Col Alt, Costes dal’Ega, Arlara y Piz Sorega sará daverc dales 7:15 inant y chi de coliamënt danterite dales 7:30 inant. I ofizi skipass de Corvara y San Ciascian deura dales 7:10 y dai paisc de Badia, La Ila y Calfosch gnarál metü a jí dales 6:45 ales 7:45 n sorvisc de transfer por podëi pié ia. Do le goste pón jí a ti ciaré ala gara de Copa dl monn sön la pista Gran Risa, cun la pröma manche che mët man dales 10.00. Informaziuns sot a www.altabadia.org.